Meghalaya nung nashi shi menokdangtsü : BJP

Shillong, June 6 (Agencies): Nashi tepseta ayokba dak sendakba nung Centre telemtetba anema BJP party lenir ano ka mapa toktsüba sülen Mongolbarnü BJP puri Megahlaya nung nashishi nokdangtsü ta osang adokbaji teyazü ta shiogo.
Party-i ashiba agi, iba amala telemtetba ya state sorkari agitsü.
BJP pur Meghalaya incharge Nalin Kohli-i, iba teyazü osang prokshiba ya Congress pur dak tongloktsü aser taruba küm election mechi nung yimden yimsüsüba onük ka kin o kin anema kümdaktsüogo, ta ashi.
Centre-i shishilembadak nashi tepseta ayoktsüba nokdangba anema North Garo Hills district BJP tir, Bachu Marak-i yashi BJP telok toktsüogo.
“Ni Garo nunger tamangba aser tangatetba anema moutettsü kechiyong Garo nunger lokti tejangraba aser tebilemdangbatem kümzüka ayutsüji kü khuret lir. Nashi shi achiba ya onok sobaliba nung shilem ka lir,” ta mapa toktsüba sülen Bachu-i ashi.
Kohli-i ashiba agi, parnoki pa mapa nungi anenba pelashishia agizükogo kechiyong pa party nungi indoktsüba dang liasü.
“Congress puri parnok ajangzüktsü mechi nung Meghalaya nung BJP puri nashi shi nokdangtsü meranger ta osang teyazü prokshir. Item osangtem kata ochi mali kechiyong asenok constitutional scheme kübok Centre nung aliba sorkari state sorkari telemtetba agiba alema meinyaktettsü,” ta Kholi-i ashi.
Meghalaya atema BJP pur onük ka dang lir aji Ato Kilonser Narendra Modi indang ‘Sabka Saath, Sabka Vikas’ onük lir aser iba dak ajemdaker state nung terenlok bener arutsü nükjidong nung election nung tokteptsü, ta paisa ashi.