Tibet nunger ana Buddha süngyanglu ka auyaba atema apu

Itanagar, June 6 (Agencies): Delhi police-i Hombarnü Delhi kübok Majnu Ka Tilla tesem nungi Tibet nunger ana küm 900 tain ‘Lord Buddha’ indang süngyanglu ka ayoktsü merangya lia apu. Iba süngyanglu ya Arunachal kübok Tawang district nungi aouyaba liasü.
Police-i ashiba agi, osang tejangja ka angazükba sülen ‘Crime Branch sleuths’ telok kati Ngawang Tsundue (29) aser Lobsang Gakey Sherpa (26) na anepdang 10:00 ako shi nung apu. Iba süngyanglu ya Majnu Ka Tilla tesem nung Gurudwara ka anasa talir takar ka dang sen crore 1.40 yong ayoktsüba liasü.
Tsundue ya Himachal Pradesh kübok Kangra tesem nung alir aser Sherpa ya Majnu Ka Tilla tesem nung Punjabi Basti nung alir, ta police-i ashi.
“‘Terton Pema Lingpa’ süngyanglu ya Tsundue-i May 31 aser June 1 aonung tsüngda nung Arunachal, Tawang nung Sangyeling gompa nungi ‘Cheepa’ tekolakbaer kidang nungi aouya. Iba ajanga Arunachal nung tipmedemi liasü,” Deputy Commissioner of Police Madhur Verma-i osangbenertem dang ashi.
“June 4 nü tamangba yimsü dak sendakba nung süngyanglu ka aouyar north Delhi nung ayoktsü merangba osang tejangja ka police-i angazüka liasü. Kasa osang ajanga iba süngyanglu ya sen aika ajangzüktsü nükjidong nung Tibet-i shibelener aotsü liasü ta metetdaktsü,” ta Verma-isa ashi.
Tsundue aser Sherpa ket nungi ngutetba süngyanglu ya aso 12buba AD indang lir aser Buddhist nunger atema kanga tongtibang lir. Iba süngyanglu ya international shishilembadak crore aika alang lir.
“Bushisüngdangba mapang, Tsundue-i police tem dang ashiba agi, Pa Tibet nunger lir aser 2009 küm India-i aru. Pa Himachal Pradesh, Dharamsala nung lia alidang Tawang Cheepa tekolabaer jala den metettepa aküm aser tena 2011 küm kibong aküm. Tsundue-isa ashiba agi, mapang tatsüka tsüngda nung tena balaadok. Iba sülen nungi pa Cheepa’er kibong den tsükchitepa aru. Pai ‘Terton Pema Lingpa’ süngyuanglu par kidang aliba jangjaa liasü anungji pai iba süngyanglu sen aatsü aser par kibong tenüng menüktsütsü asoshi aouya,” ta Tsundue-i ashiba Verma-i metetdaktsü.