Russia Military Intelligence-i US voting supplier hack asü: Report

Washington, June 06 (Agencies): Hillary Clinton aser Donald Trump tsüngta tatembang buba election magi tsüngta Russia nunger computer ‘hack’ asürtemi US e-voting yangluba company amak, ta intelligence osang ka temai adoktsüba nung shia lir. Computer hijack asüba malware amshia Russia nunger ‘hacker’ temi America nung local sorkar ketdangser indang inyakyim metettsü merang, ta National Security Agency (NSA) amanger, ta The Intercept-i sangdongba osang nung shia lir.
Iba osang ajanga ashiba agi, Russian Military Intelligence ajanga tangar puatsüsa email balala ya local election ketdangser 100 dak tali dangi October-November mapang yok.
US intelligence agency temi The Intercept dang tarutsü nung kümzüka alitsü asoshi nüngdakba kuli kar yua alitsü shiogo aser iba ama The Intercept ajanga inyak, kechiyong iba telok ya nüburtem aikatibo memetet.
Saka iba inyakyim ajanga election maparen nung kongshi asü mokongshiar mejangjateti lir, ta iba document nung shia lir.
US intelligence agency ajanga January nung asadangtetba dang nungi iba otsü temai adokba nung timba lir.
“US mesüra local electoral board tem indang inyakyim ya Russia intelligence ajanga ngutet, saka iba system ajanga vote züngdangba nung mokongshi,” ta Department of Homeland Security ajanga January nung bushiteta liasü.
The Intercept dang iba document temai adoka osang agütsüba asoshi arishi küm 25 tain, Reality Leigh Winner federal kentdangsertemi puogo, ta Tom Winter-i Twitter nung zülutsü. Iba otsü temai adoker ghonda eshika sülen Winner anema mitkar osang bendena brokshiba aser samatsüba ken o ka benok.
Trump-i election nübuyim nung Russia den yariteba inyak, ta ken o ka benoka FBI ajanga bushisüngdang tenzükba ajanga Opposition teloki Donald Trump aitsüba mapang ka nung iba osang ajanga anu Trump jenjang tamajungba kümdaktsür, ta osang ajanga ashi.
Trump-i aiben Russia tir, Vladimir Putin tenüng sanga arur aser taoba US tir, Barack Obama, taoba Secretary of State, Hillary Clinton aser US indang obendangba inyakyim aija arur.
Trump ya Putin-i amshinütsü amshir, ta Clinton-i taoba küm shia lir.