DIPR Coordination senden amen

Kohima, June 07 (TYO: June 07, 2017 nü IPR Officers’ Conference Hall, Kohima nung Department of Information & Public Relations coordination senden ka amen, aser iba senden nung department kübok section balala nungi ketdangsertem dena liasü.
Iba senden nung jembidang IPR Director, Limawati Ao-i ketdangsertem dang pei nem lemzüktsüba mapa ajak nendaka inyaktsü, aser pei ataba tesem nung tenzüktsü atema renema alitsü ajungshia liasü.
Department ajungkettsütsü aser tajungba akumtsü atema inyaktsüji ketdangsertem teinyaktsü shilem lir, ta paisa ashi.
Paisa ketdangsertem dang, directorate nung süaka mesüra district tem nung süaka kanga khuret bena inyaktsü aser temaba ketdangsertem meliaka pei teinyaktsü shilem junga inyaktsü metetdaktsü.
Senden nungsa Journalists Welfare fund indang jembiba den külemi tawa ayonga amungba mezüngbuba Nagaland Film Festival indanga reprangshia liasü.
Senden nung ketdangser taintemi parnok tebilemba lemsatepba den külemi department inyakyim tajungba akumtsü atema tebilemba onüktem benoka liasü.