Temesepba mozü aser gari auyartem apu

Dimapur, June 07 (TYO): May 27, 2017 nü Dimapur Police-i Chumukedima nung Maruti Gypsy gari ka soter mita reprangdang ganja seret 110 shi apu, aser iba dak sendakba nung Phek kübok Elyinimi nungi Pfulo Mero’er jabaso, Neikhrope Mero apu, ta tanü Addl. Dy Commissioner of Police/PRO, Dimapur Nagaland-i sangdong ka nung metetdaktsü.
Ano June 6, 2017 nü Dimapur Police kübok 9 NAP (IR) sepaitemi mita reprangba mapang ganja seret 10 apu aser iba dak sendakba nung Banskuli, Jharkhand nungi asür, Dasrath Gorain’er jabaso, Sonatam Gorain puogo, ta sangdong nungsa shia lir.
Maneni June 07, 2017 anepongi Dimapur Police kübok Mobile Units-i 7th Mile nung West Bengal registeration Maruti Swift ka soter mita reprangdang ‘Father’s Day’ sempet agütsütsü taseptsü ka telung nung temesepba mozü aika mima bener lia puogo; iba taseptsü nungji Spasmo Proxovon süngjang 23,800 aser Nitrojen süngjang 1,500 shi liasü, aser iba dak sendakba nung nisung ana- Makhil village, Senapati nungi Chopfkieozho’er jabaso, Besil Ozhi aser Topawanglika, Imphal East nungi Zila Meiti’er jabaso, Deepak Meiti na puogo, ta kasa sangdong ajanga metetdaktsü.
May 31, 2017 nü mejangjaba nisung anati Hojai nungi Dimapur tashi Maruti Swift ka ‘hire’ asüba sülen driver nemji mozü chidaktsür Purana Bazaar, Dimapur nung toktsür gariji auyar ao. Iba sülen Dimapur Police AVTS den East Police Station staff temi Toluzuma kübok tesem ka nung auyaba gariji angu, iba tesem nungjisa gari balala indang registration plates, tires, gari parts aser gari auyadang amshiba oset balala angu, ta Dimapur Police-isa metetdaktsü.
Iba dak sendakba nung tang tashi nung nisung ana pua lir, aser tenaji Khumai village, Senapati nungi Nangpou Tungam’er jabaso, Zhoveo Tungam aser Kumai village, Senapati nungi Dakho Tungam’er jabaso, Shiba Tungam na lir, aser tenaprong tang telidak tesemji Toluzuma village, Dimapur lir, ta kasa sangdong ajangasa metetdaktsü.