BJP lennirtemi pei chirnurtem tribal kibongtem den kibalembudakjang: Ravi Naik

Panaji, June 7 (Agencies): BJP lennirtemi tribal kibongtem semdanga chiyungba aija taoba Goa Chief Minister, Ravi Naik-i BJP lennirtem dang parnok chirnurtem Dalit aser tribal kibongtem den kibalembudakjang ta tayongzükba ka agütsüogo.
Naik-i osangbenertem dang sensaksemdang, tribal kibongtem nung tables aser chairs lir, saka taoba hopta ka shi BJP MP aser MLA temi ali nung mener chiyunga sayubaji parnok tenüng tajung agitsü atema dang lir, ta ashi.
“BJP lennirtemi parnok (educated) jabasotem aser jalatem tribal kibongtem nungi (educated) jabaso jalatem den kibalembudakjang. Iba sülenji parnoki taküm piyong Scheduled Tribe purtem indang chiyungtsü chitettsü. Parnoki iba mapa inyaktetra, ni BJP lennir ajak nem tetushi agütsütsü” ta Naik-isa shisem.
Union Minister of State for Home, Subhash Bhamre-i anogo ishika tejaklen Goa nung tribal kibong ka nung chiyungba sülen Naik-i iba osang metetdaktsü.
BJP-i linük ajungalen Scheduled Caste aser Scheduled Tribe nung züngsema aliba aser loktiliba nung teküpoktiba jenjang nung alirtem den sendakteptsütsü atema maparen tenzükba nung iba ya shilem ka lir.
Goa nung tribal pur rongsenkettsüng tsütsü jenjang ajungketogo aser parnok kidang tables aser chairs lir, ta Naik-isa osangbenertem dang ashi.
“Kechiba BJP lennirtemi ali nung amener. BJP lennirtem kidang sorochioktsü atema ST, OBC nisungtem mapa inyaktsü yua lir. Parnok anogoshia parnoki sorochiokba chiyunger. Kechiba parnoki iba mapa inyaker? Parnok kechi tangatetba nung tenüng atema iba mapa inyaker” ta Naik-isa asüngdang.