NE nung state BJP tirtemi nashi tetuyuba atema khuret abener

New Delhi, June 7 (Agencies): BJP tir Amit Shah-i North-East semdangtsü aliba jakdang, party state unit tirtemi nashi indang tenokdangba agütsüba ajanga NE nung BJP-i tetsükdaktsü ajurutsü aser national party ka indang jenjang raksatsü akok ta metetdaktsüogo.
Assam, Arunachal Pradesh, Meghalaya, Mizoram, Nagaland, Tripura aser Sikkim nungi BJP unit tirtemi osangbener dang ashiba agi, parnok state tem nung tenokdangba tasentem magütsütsüla.
“Iba tenokdangba ya yanglushitsüla” ta Assam BJP tir Ranjeet Kumar Das-i ashi aser külen Nagaland BJP tir Visasolie Lhoungu-ia “iba onük ya Nagaland nung alirtem atema tebilemtsü ka lir. Iba mesükba telemtetbatem ajanga BJP-i North-East sobaliba anema nokdaker ta mashileni angatettsü akok” ta metetdaktsü.
Centre sorkari nashi metepsettsü aser ozüng alema shibelen masütsü tetuyuba agütsüba anema Meghalaya nung BJP tongti lennir anati party toktsüba sülen, Mongulbarnü BJP tirtemi parnok tebilembatem lemsatep.
Hombar aonung BJP North Garo Hills district tir Bachu Marak-i party nung anen aser taoba hopta West Garo Hills district tir Bernard Marak-ia kasa onük nung ajemdaker party toktsü. Garo nungeri akhidang nung nashishi chia arur aser ibaji parnok sobaliba nung lir, ta shia Meghalaya nung BJP lennir anati iba telemtetba agia liasü.
Taruba hopta Amit Shah-i Arunachal Pradesh semdangtsü sentong lir. BJP-i North-East nung takok nguyonga arur aser state asem- Assam, Arunachal Pradesh o Manipur nung parnoki state sorkartem kümteta lir.
2019 küm Lok Sabha elections nung BJP-i northeast nung menden 24 aliba nungi teimbaka nung takok angutsü teimla lir.
Northeast kübok Sikkim state nungbo Dalai Lama tesayuba ajanga nisung aikati shi machir, saka state BJP tir Dal Bahadur Chauhan-i ashiba agi, chiyungtsü dak sendakba nung talenba kecha malitsüla.
Arunachal Pradesh unit tir Tapan Gao-ia ashiba agibo, “iba telemtetba atema Centre dak tai metongloktsütsüla, kechiyong Supreme Court-i tuyuba nung ajemdaker Centre-i iba tetuyuba agütsü.”
Ajisüaka, paisa ashiba agi, “Arunachal Pradesh nung iba tetuyuba agütsütsüji tamakoktsü aser agütsü nunga mapa küma meinyaktettsü. Democratic linük ka nung, sorkartemi nübortem taginüba akhümtsübutsüla.”
Meghalaya BJP tir Shibun Lyngdoh-i ashiba agi, district ana nung tirtemi party nungi anenbaji parnok nija tangatetba ajanga lir.
“Nübortem taginübatem anema kecha meinyaktettsü. Asen Linük Temzüng nung tamangba yimsü temeten agüja lir, anungji nübortem temulung yirutsütsü atema kecha meinyaktsüla” ta Shibun-isa nashi nokdangba indang tebilemba metetdaktsü.
“Onoki nashi akhümtsübur, saka yangi Hindu nungertemi Durga Puja mapang jangtem tepseta tenla agütsür. Iba tenokdangba ajanga parnoka timtemtsü. Tang onok autonomous hill councils indang elections atema kanga mazüngi lir. Iba maparen tembangba sülen, party-i nashi indang onük benoka asadangtsü aser iba osangji centre nung lennirtem dangi abentsü” ta Assam BJP tir Ranjeet-isa metetdaktsü.
Mizoram BJP state tir, J V Hluna-ia ashiba agi, taoba mapang BJP tir Amit Shah-i state semdangdang party lennirtemi pa dang Mizo nungeri sobaliba aser inyakyim memelenshitettsü ta shiogo.
“Onok Khristantem lir aser onoki Laishiba amanger. Onoki onok libaliro memelenshitettsü ta pa dang ashi aser idangji Amit-i ‘Ibaji nenok dak aket. Nenoki kechi sülen anidaknür’ar anidakang’ ta langzü. Anungji, iba tetuyuba ya Mizoram nung inyakang ta onok dangbo mashitsü” ta J V Hluna-isa shisem.
Tripura state BJP tir Biplab Kumar Deb-ia, Tripura nung aliba nübortem tamangba tsütsü temeten lir aser parnok achiajemba nung tenokdangba kecha magütsütsü, ta ashi.
“Iba mesükba tenokdangbatem ajanga BJP ya North-East sobaliba anema lir ta nisungtemi bilemtsü. BJP ya national party ka lir anungji iba mesükba telemtetbatem magitsüla. Iba tetuyuba ajaga nisungtemi nashishi aser tanga shitem indang onük jembitsü tenzükogo. Iba ajanga asenok inyakyim aser maparen nung tetsükdaktsü bener arutsütsü” ta Nagaland state BJP tir Lhoungu-isa shisem.