AAPSU-i sorkar amokmeren

Itanagar, June 7 (Agencies): Chakma aser Hajong refugee tem nem lisopur jenjang agütsütsü asoshi Centre sorkari telemtetba agiba dak sendakba nung June 10 tashi nung iba dak sendaka aliba lokti ajak senden ka state sorkari mayongzükra mapang telatet ka makai longkak aittsü, ta All Arunachal Students’ Union (Aapsu)-i sorkar amokmeren.
Kaketshir lokti-i May 27 nü senden ka nung iba keno dak sendakba nung lokti senden ka akatsü asoshi lemtet aser iba senden nung state nung MLA 59 aser state nungi MP asem prongla kechi südir süaka adentsüla ta lemtet. Iba sülen parnoki chief minister Pema Khandu dangi tezüluba nung June 10 nü tashi nungbo iba senden akatsü asoshi takhangba ka agütsü.
Chakma aser Hajong kintem ya 1960s mapang nung parnok aliba li Kaptai dam nungi tzü moshiba ajanga metsüngbangadok aser iba ajanga parnok Arunachal nung arua jenoktsüsa aküm. Parnok Arunachal-i aruba mapang nungi tenzüka tang tashi keno balala adoka arudar. Refugee temnem lisopur jenjang agütsütsüba sentong ya 1990 nungi tenzüker kaketshir lokti-i anir anema arudar. Parnoki ashiba agi, refugee tenem lisopur jenjang agütsüra tribal tem state nung minority akümtsü.
“Tezüluba nung takhangba agütsür joko anogo 7 shi aoer, saka sorkari tang tashi kecha telangzüba magütsür. Iba amala tongtibang ken o ka nung sorkari iba amala yimya benshiba ya magizükteter,” ta Aapsu tir Hawa Bagang-i ashi.
“Sorkari iba senden mayongra mesüra MLA aser MP tem iba senden nung medenra parnoki iba sülen atalokba khuretji abentsü,” ta paisa ashi.
“Centre sorkari Arunachal nungertemji yimjung meimba kin ta angatettsüla aser yamaji dang toktsütsüla. Mapang ka nung sorkar dang refugee tem aser onok na tsüngda shimtsü asoshi onoki asüngdangtsü aser iba anogoji marudaktsüner,” ta pai maneni shisem.
Bagang-i ashiba yarisema Aapsu general secretary Tobom Dai-i ashiba agi, “Onoki Centre aser state sorkar nem tezüluba nung takhangbatem aika agütsüogo aser lisopur jenjang agütsütsüba dak sendakba nung telangzüba tajung mangur. Center-i Arunachal ya nisung dokdendak ka kümdaktsüogo aser onoki iba ya joko magizüktsü.”
Ajisüaka Soraka otongdar Bamang Felix-i ashiba agi, sorkari kaketshir lokti nungi kecha osang mangu.