UNSC-i Syria sorkar anema tenokdangba sentong benoktsü akhanger

Damascus, August 20 (Agencies): United Nations Security Council (UNSC)-i Syria sorkar dang tongpang nung amshitsü osettsüset mayoktsü tenokdangba sentong benoktsü takhangba ka alima ajunga nung nübur temeten asoshi nokdakba tongti telok kati benokogo.

Syria Tir, Bashar al-Assad-i aniba Syria sorkar miktartemi par tayimtsü amshia Damascus yimti anasa bomb-tem tsükdakba amakba ajanga tai maketba nübur 100 dak tema tepsetba sülen Human Rights Watch (HRW)-i tenokdangba sentong benoktsü takhangba ya benoker lir.

“Syria sorkar anemertemi agia aliba Douma jila nung bomb-tem tsükdakja amaktsüsa sorkar anemertem atsükba mesüra tongpang nung amshitsü osettsütem rizüngba kuli bushiteta mali. Anungji, tarutsü mapang nung tan amala lendong matalokdaktsütsü mechi Syria sorkar anema tenokdangba sentong benoktsü akhanger,” ta HRW teloki metetdaktsü.

Syria sorkar mitkartemi par tayimtsü amshia tan amakdang tai maketba nübur ishiba agi nisung 112 shi tepsetba osang bushiteta lir.

“Nübur meyirijang jenti shishilembatepa aliba tesem nung bomb tsükdakja amakba ajanga Syria sorkari pei nütsüng yongsük züngoka maliba kuli tejangja angur,” ta HRW nung Deputy Middle East Director, Nadim Houry-i kanga jashia ashi.

Iba ama ozüng alema inyakba maparen nokdangtsü mechi UNSC-i taoba mapang lemtetbaren mapa küma inyaka Syria sorkar anema tenokdangba sentong benoktsü akhanger ta pai ashi.

“Syria sorkar mitkartemi par tayimtsü amshia tan tesüsa lendong atalokdaktsübaji tebang agi mejembitetsüsa lir,” ta lendong atalokdaktsüdak anogo asem agia semdanga bushisüngdangba sülen UN Humanitarian Chief, Stephen O’Brien-ia metetdaktsü.

2011 küm nungi tenzüka tongpang raradang Syria sorkar mitkartemi tan inyakba ama, tai maketba nüburtem alidak bomb-tem tsükdakja amakba ajanga tanü tashi nung ishiba agi nisung 250,000 shi tepsetba osang bushiteta lir.