Tir Pranab-i ‘Selfie With Daughter’ App tenzüktsüogo

New Delhi, June 09 (Agencies): Honibarnü Tir, Pranab Mukherjee-i ‘Selfie with Daughter’ app tenzüktsüogo; iba ya mobile application ka lir aser iba app tenzükba nükjidong ya, tebok nung tanur tetsür bena lira raksaa intokba aser tetsür/tebur agitsü shimba onük anema nüburtem nem awareness agütsütsü atema lir.
Iba app tenzüktsüba sentong nung Mukherjee-i nüburtem dang pei jalatem den noksa tangoker iba noksaji iba app nung upload sütsüba ajanga iba mapatong ya takok ngudaktsüba nung shilem agitsü ayongzük.
“Tetsür bena lira raksaa intokba mesüra tebok nung tanur alidang tetsür mesüra tebur agitsü shimba anema ‘Selfie with Daughter’ ya alima ajaklen benshir,” ta Tirisa ashi.
Iba mapatong ya 2015 küm June ita nung Haryana, Jind district kübok Bibipur yim nung taoba mapang sarpanch, Sunil Jaglan-i tenzüka liasü.
Jaglan-i joko mapang talangka tetsürtem nem tashi agütsütsü aser yim terenlok atema inyaka arur.
Iba mapatong nükjidong ya tetsür tsüraburtem nümadangdaktsütsü aser tanur tesür/tebur ratio tajungba akümtsü atema lir.
Iba app ya asalentong tajung ka lir ta shia Tir, Mukherjee-i Jaglan-i Haryana nung iba mapatong inyakba atema pa nem tenüngsang agütsü.
‘Selfie with Daughter’ mapatong ya Ato kilonser, Narendra Modi-i benokba International movement ka lir, aser cricket asayar, Sachin Tendulkar-ia iba mapatong pusema social media ajanga ajungkettsütsü melungogo.