Nagaland CM-i anir telok aser kijatemi asür SS Khaplang mang ayimer

Dimapur, June 10 (TYO): Nagaland Chief Minister Dr. Shurhozelie Liezietsu-i NSCN-K tanishir SS Khaplang asüba atema mangyimba metetdaktsüogo.
“Yashi nikongdang Myanmar nung SS Khaplang ajungbena asüba osang angashia kanga aoksar aser temulung raksar. Naga yimten tebilemtsü angatetteptsü aliba mapang ka nung Naga nunger lennir tongtipang Khaplang asübaji tesasatsüka lir” ta Dr. Shurhozelie-i sangdong ka nung ashi.
“Naga yimten teloktem ajak longjemer India sorkar dang asenok taginüba ashitsü mapang ka tongogo” ta paisa shisem.
NSCN-K-i India sorkar den ceasefire agienba sülen, Nagaland sorkari Myanmar nung NSCN (K) lennirtem den ajuruteptsü atema teshimtet telok balala aiben yokogo, ta chief minister-isa sangdong nung ashi.
Naga yimten tebilemtsü tekaratiba nung latettsü atema onoki NSCN-K dang India sorkar den yimjung olemtep nung adentsü atema asüngdanga arur. Ita ishika tejaklen, asür Khaplang-i tagitsü onüktem denra, India sorkar den olemteptsü mulunga lir ta ashi, saka iba dak sendakba maparen ano metenzük lia, pa ajungbena asüba atema kanga sasar, ta Dr. Shurhozelie-isa shisem.
“Tasür nem tetushi agüja aser pa mang ali nung maremdang, ni Naga nunger ajak dang, asen Naga yimten tebilemtsü atema telemtetba ka agitsü atema tenangzükba agitsü aser bendanga agütsütsü ayongzüker. Asen lennir bilemteta aser tetushi agüja, asenoki yimjung, putepa aliba aser Naga nunger ajak tiptema alitsü atema bendanga agütsüdi. Asen lennir pa taküm piyong Naga nunger atema inyaka aruogo, anungji pa nem tetushi agüja aser asenok taküm alidang Naga yimten tebilemtsü atema telemtetba ka agitsü merangdi” ta paisa ayongzük.
“Sorkar aser Nagaland nung alirtem ajak tenüng nung, ni tasür kibong den asükhu lemsateper aser Tsüngremi parnok nem tesünep agüjang ta sarasademtsür” ta Chief Minister-isa ashi.
NNC-FGN-ia sangdong ka nung NSCN/GPRN Chairman, SS Khaplang asüba atema asükhu lemsatepba metetdaktsü.
“Na asen nisung atema Tsüngremi agütsüba sempet ka liasü. Nai kanga meranga inyakogo aser onok ajungmesogo. Asenok külem alizüng matongdang, na Tsüngremi anir ogo aser iba atema onok temulung raksar, saka onok taküm alirtemi, tarutsü asen Naga lima atema maneni alizüng matong tashi inyaktsü aser nübortem tsüngda tenangzükba agiba nungi masetshitsü” ta Tir, Gen. (Retd) Thinoselie M. Keyho aser Kedahge, Brig. (Retd) S. Singnya nati sangdong nung shia lir.
Maneni, NSCN-ia sangdong ka nung asür SS. Khaplang’er kibong den asükhu lemsar, ta metetdaktsü.
“Onok taoba Chairman asür Isak Chishi Swu-i tatok agütsütsü aser putepshitsü sangdongba nung ajemdaker, onoki asen Kümtetdakba Yisu Khrista tenüng nung, SS. Khaplang-i yimtenren tsütsü aibelenba aser ozüng alema inyakba mapatem ajak atema tatok agütsüogo.” ta NSCN lennir Th. Muivah-isa sangdong nung shia lir.
Tsüngremi tasür kibong nem tesünep aser tashi agüjang ta onoki sarasademtsür aser lennir tanüla nem teti anisüngzük ngudakjang ta NSCN-i sarasademer, ta Th. Muivah-isa shisem.
Maneni Nagaland Tribes Council (NTC), NPCC Tir K. Therie aser MP Neiphiu Rio nungertemia sangdong balala nung SS Khaplang ajungbena asüba atema temulung raksaba den asükhu lemsatepba osangtem metetdaktsüogo.