Truck nung khu tali abenba agi lenmang raksar

Dimapur, June 11 (TYO): Truck garitem nung khu tali abenba agi National Highway 29 lenmang raksar, aser talisa Kohima aser Dimapur tsüngda tang teyangludak four lane lenmang nung lendong ataloktsüsa kümdaktsür, aser kuli balala ajanga anogoshia lendong balala ajuruba den külemi ainlen senzürtemi timtem kanga ajurur.
Tim ketdangseri Motor Vehicle Act,1988 nung aliba ama inyaktsüla, kechiyong gari nung khu abentsü atema lateta aliba dang nungi khu kanga tali abenba atema Section/Rule Ss.113(3),114,115 r/wS.194(I) of M.V Act kübok tajemba agi senchi 2,000 achitsü shia lir, aser khu tali abenba ton shia senchi 1000 aser off-loading atema agütsütsüla.
Nagaland nung aliba gari lenmangtem nung truck nung khu tali abener, aser khu tali abenba agi gari lenmang raksatsür, iba ya ozüng alema inyakba ka lir aser sensotem nem lendong bener arutsür.
Nagaland nung entry point ajak nung weigh bridges (gari touzük odangba) amenokba den loading agents ajanga truck nung khu oshiba inyakyim benoktsü nüngdaka kümogo.