NBCC, CNTC, CNC-i SS Khaplang asüba mangyimer

Dimapur, June 11 (TYO): Tanü Nagaland Baptist Church Council (NBCC)-i sangdong ka ajanga NSCN (K) Mendenbuba, SS Khaplang alima nungi pilaba atema mangyimba metetdaktsü.
“Naga yimtenren nung tang ama tongtibang mapang ka nung asenoki lenla ajaklen shisatsü aliba lenirtem nüngdaker. NBCC-i joko mapang talangka yimjung maparen nung inyaksema arur, aser iba mapang nung NBCC lenirtemi Mendenbuba (Khaplang)-a aiben ajurua aruogo, aser paji tangatetba aliba lenir ka aser akumli piyong Naga nunger yimtenren onük atema pai akokba tashi agi inyakba lenir ka ta jangjaogo. Pa asüba ajanga, asen nükjidong ataloktsü atema inyaker lenir ka makai kümogo,” ta NBCC-isa metetdaktsü.
“Lenirtema asütsü, anungji Nagaland aser Myanmar nung Naga nunger aser tangalen Naga nungeri NSCN (K) Chairman, SS Khaplang atema mangyimdang asenoki Tsüngrem nungi tesünep aser anisüngzük ngudakjang ta sarasademer. Iba den külemi asenoki tamang kateta aliba aser tang asenok den aliba asen lenirtemi tarutsü putu atema Tsüngremer shisatsü nung inyaktsü atema sarasademtsür,” ta NBCC-isa metetdaktsü.
Central Nagaland Tribes Council (CNTC)-i sangdong ka ajanga, NSCN (K) Mendenbuba, SS Khaplang, Taka, Myanmar nung par kidang ajungbena asüba atema kanga jashia mangyimer, iba ya takoksa ka lir aser Naga nunger atema tesasatsüka lir, ta metetdaktsü.
Media Cell CNTC-i sangdong nungsa, “SS Khaplang ya, Naga nunger atema akümli piyong nüchiso atema rarar walunir ka liasü, aser paji, pa tasünü tashi chichia linük meimer ka aser taküm bendanga agütsür ka ta teti bilemtettsü,” ta metetdaktsü.
“Naga nunger atema pai tenlabatem aser raraa arubatemji Naga nunger nüchiso bushiba putiotsü nung kodanga mamatoktsü. Khaplang asüba ajanga Naga nunger lenir tajung ka aser Naga nunger atema inyaker ka makai kümogo. Pai pa tasünü tashi pa tangatetbatem nung matsüngshii nokdak, aser ibaji tarutsü lanuputi mamatoktsü,” ta sangdong nungsa shia lir.
“Iba ama mangyimba mapang nung ajak takoksang Tsüngemi mangyimer kibong nem tesünep agüjang aser asür nem anisüngzük agüjang ta CNTC-i sarasademtsür,” ta Media Cell CNTC sangdong ajangasa metetdaktsü.
CNC: SS Khaplang ya NSCN tenteter züngsemtem rongnung ka liasü, aser 1988 küm mangatettep adokba tashi NSCN Vice Chairman aser GPRN Vice President inyakogo; Naga nunger kibong ka ama tanaben onoki melongjemteti alidang pa asüba atema jashir, ta tanü CNC General Secretary, Rev.Seksim Kasar-i sangdong ka nung metetdaktsü.
“Onoki pa asüba atema mangyimba den külemi asür kibong züngsemtem nem tesünep agüjang ta sarasademtsür. Tsüngremi pa aser onok nem tatok agüjangma, aser tatem maka tesünep agüjangma ta sarasademer,” ta sangdong nungsa shia lir.