Floyd Mayweather-i Conor McGregor den tsüngteptsü molungogo

Los Angeles, June 15 (Agencies): nüngtugu Boxing asayar Floyd Mayweather aser mixed martial arts asayar Conor McGregor na tsüngteptsüba ajaki yongyaa aliba ataloktsü ta Mongolbarnü metetdaktsüogo. Iba asaya tsüngtepba otsü nung sen timtiba aaba asaya rongnung ka asütsü.
Mayweather aser McGregor na Las Vegas’s T-Mobile Arena nung August 26 nü tsüngteptsü. Tena MMA yimya nung masü saka boxing yimya nung tsüngteptsü.
Arishi küm 40 tain Floyd ya tang tashi asaya 49 nung shilem agiba nung khen danga tamakok ngua mali aser pai iba asaya ajanga 50 ben buba takok angutsü asoshi merangtsü, kasa mapang nung McGregor atema 12-round boxing asaya ka asayatsüji kangabo temela masütsü aser pai iba asaya kokra otsüsütsü asütsü.
Mayweather-i McGregor den asayatsüba telemtetba agiba Instagram ajanga metetdaktsü aser pai asayar anaprongla indang noksa ka dena post sütsü. McGregor ya UFC pay-per-view nung temaba jenjang nung lir aser Mayweather ya boxing asaya nung sen timtiba aaba asaya nung shilem agir ka lir. Pai Manny Pacquiao den asayaba nung sen million 250 aazüka liasü.
Boxing asayaba yimya nung asayaba ajanga Mayweather nem maongka tali agütsütsü kechiyong McGregor asangwa boxing asayaba dak alaker pa boxing masayar.
McGregor iba asaya asoshi Irish boxers tem den training agitsü. Pai California boxing license yaküm agizüka liasü aser Nevada nungi temelaba angutsü asoshi atadar.