Niti Aayog-i taküm Innovation Labs 1000 bendenloktsü

June 17, 2017 (Agencies): Niti Aayog-i India ajunga nung school tem nung innovative skill tali ajungkettsü nükjidong nung taküm küm tsüngda Atal Tinkering Labs (ATL) 1000 amenoktsü, ta ketdangser kati metetdaktsü. Iba ajanga ibala mesükba lab India nung 1500 shi akümtsü.
ATL tem amenokba ya tang aliba education yimya nung temelenshi ka adokdakjaa school level nungi tenzüka osettsüset tasen puraputitea amshitsü asoshi tajungshiba ka agütsütsü nükjidong nung lir, ta Niti Aayog’s CEO Amitabh Kant-i ashi.
“Global innovation index nung küm ana tsüngda nung India jenjang 21buba tongtetogo. Iba lab amenokba nükjidong ya school level nungi tenzüka osettsüset tasen puraputitea amshitsü asoshi tajungshiba ka agütsütsü asoshi lir,” ta Paisa ashi.
Niti Aayog, Atal Innovation Mission kübok lab tem amenoktsü asoshi private aser government school tem nungi tejangrar tem jaoka osang agütsüogo, ta pai shisem.
“Onoki taküm school 1,000 shimtsü koba yaküm den medemdangra school 457 dang shima liasü. Onok keti application tem aika arura ano tali lapoktsü asoshi onoki molunga lir,” ta Kant-i ashi.
Yaküm iba sentong asoshi application 13,000 dak tali arua liasü aser item rongnungi tetoktepba ka ajanga school 457 shimtet.
Kaketshirtem class 6 nungi 12 tashi nung azüngertem parnok sempet tali arangtetshitsü asoshi school shia nem küm 5 atema lab tem anepalutsü asoshi sen lakh 20 den külem 3D printers aser tanga osettem agütsütsü.
Maneni Niti Aayog-i ‘Mentor India’ ta ser sentong ka amenoktsü asoshi sentong lir, koba nung item lab tem nung lenirtemi kaketshirtem volunteer süa arua yaritsü. Iba sentong ya atalokra India nung iba ya ‘volunteer mentor network’ tulutiba asütsü, ta Kant-i ashi.
“Mentor India mission ajanga institution, corporates aser tanga wadang nungi innovation lenirtem hopta shia lab nung kaketshirtem yaria ghonda ishishi parnok mapang indoktsü asoshi jaoktsü,” ta paisa ashi.
Item sentongtem ya India nung tzü tajemtsü temerek, aser kibong shia nung 24×7 electricity maliba tebilemtsütem amala asoshi telangzübatem ngutettsü nükjidong nung amenoker, ta Kant-isa maneni shisem.