Delhi Police-i Google 2-Step Verification Scam lemsatep

June 17, 2017 (Agencies): 2-step verification (mesera one-time passwords) ya nisung aikati online account tem kümzüka ayutsü asoshi tekümzükba yimya tajungtiba ta bilemer saka mapang aben iba yimya nung kangabo temolung alemtsü mali ta jangjaogo. Au 2-step verification adena aotsü ya kanga tasak saka cyber ozüng alema iyakertemi tawa nüburtem ket nungi verification codes mesera OTP angutsü mechi nung parnok ashioktsütsü meranger.
Delhi Police cybersecurity wing ajanga nüburtem dang SMS ajanga parnok ashiokja parnok indang Google accounts OTP mesera 2-step verification code tem mejangjaba nisungtem nem magütsütsü asoshi kümdangshitsü metetdaktsüogo. Item SMS tem Google nungi yokba ama kanga dang shidak amai osang zülur yoker. Ajisüaka DCP Cybercrime-i Twitter ajanga iba amala ashikülak maparen nung mashitsü asoshi kümdanga alitsü nüburtem dang metetdaktsüogo.
Item juri meim osangtem kar keti ora iba ajanga parnoki nüburtem indang Google account lapoktettsü koba nung nisung ka indang mail, Google Drive file, noksa, contact aser tanga juri osangtem rizünga lir.
Tawa Lt. Governor Anil Baijal-i Delhi Police-i item amala cyber ozüng alema inyakba maparen balala nokdangtsü aser renema alitsü asoshi chief technology officer ka mapai anioktsüba metetdakja liasü.