Harry Potter Actor Sam Beazley süogo

London, June 17 (Agencies): Actor Sam Beazley, shiba ‘Harry Potter and the Order of the Phoenix’ nung shilem agi pa arishi küm 101 nung süogo
Iba film nung Beazley-i Professor Everard shilem agia liasü.
Actor nem tetushi agüja osang kaket ka nung yamai adoktsü: “Actor aser artist Sam June 12 nü arishi küm 101 nung mejangba mesak. Asü pila sentong June 21 nü nikongtsütsü 2 nung ‘Mortlake Crematorium’ nung akatsü.”
Beazley ya film nung dang masü saka jilushi balala nung kanga dang takok ngua shilem agiba actor ka liasü.
Pa asangwa 1930s nung-i tenzüka actor ka ama shilem agia aru, pai shilem agiba rongnung “Hamlet” aser “Romeo and Juliet” densema lir.
Alima rangben rara II nung linük tenzükba sülen pa kangabo shilem magi-i ‘antique shop’ ka lapoker idakji küm ter metsüka inyaka liasü.
Iba sülen Beazley arishi küm 75 junger külen maneni film aser jiulshi balala nung shilem agi tenzük.
Pai British comedy film tem nung shilem tilala agia liasü item rongnung; “Bridget Jones: The Edge of Reason” aser “Johnny English” ano pai 2005 küm “Little Britain” episodes ana nung shilem agi aser “Midsomer Murders” o “Doctors and Casualty” nunga shilem agia liasü.
2007 küm J.K. Rowling’s indang Harry Potter novel 5buba nung ajemdaker yangluba film ‘The Order of the Phoenix’ nung shilem agia liasü. Iba ya pa asoshi tongtibangtiba film liasü.
Iba film nung Professor Everard ama Beazley-i shilem agi aser Hogwarts School of Witchcraft and Wizardry’s nung tesayurtem rongnung ajaki sapuba ka aküm. Pa shilem ya Ministry of Magic’s Headquarters nung Professor Dumbledore indang office nung jara nung noksa (portrait) ka liasü. Pa masü tsüngda iba film nung shilem agirtem rongnungi pa tambusang liasü.