Hindu convention nung ‘Hindu Rashtra’ tentettsü lemtet

Panaji, June 17 (Agencies): Honibarnü All India Hindu Convention-i India aser Nepal dang ‘Hindu Rashtra’ ta ajatsü takhangba agütsütsü telemtetba agi.
“Hindu pusemer aser India nung linük meimba teloktemi Hindu Rashtra tentettsü atema mapa inyaker. Iba mungdang nung bangzünga renemba tongti onüktem rongnung, India aser Nepal dang Hindu Rashtra ajatsübaji dena liasü” ta Hindu Janajagruti Samiti lennir, Charudatt Pingale-i osangbener dang ashi.
“Telok ajak longjemtsü aser amalitepa inyaktsü atema ayongzükba 6 buba All India Hindu Convention takok ngua tembangogo” ta Pingale-i osangbener senden nung metetdaktsü.
India, Nepal, Bangladesh aser Sri Lanka linüktem nungi telok 132 kübok züngsem 342 tashi Ramnathi, Ponda nung anogo pezünü mungdang nung aden.
Pingale-isa ashiba agi, administrative, commercial, educational aser political wadangtem nung ozüng alema mapa inyakba anema “legal campaign” ka tenzüktsü atema mungdang nung telemtetba agi.
“Item wadangtem merüktetba aser ochimashi agienba den loktiliba asoshi mapa inyaktsü tenzükba sülen ang Hindu Rashtra tentettsü lenmang lapoktsü. Hindu pusemer telok ajaki iba onük mulunga agizükogo” ta paisa shisem.
Pingale-isa ashiba agi, Hindu nunger telok ajaki linük aser tamangba yimsü kümzüka ayutsü atema longjemer inyaktsü tenangzükba agi.
Külen, Talangana nungi BJP MLA, T Raja Singh-i “nashi tepsetba nokdangtsü atema BJP-i telemtetba agitsüla” ta osangbenertem dang ashi.