Kohima DC-i Officers Hill Smart Colony project tenzüktsü

Kohima, June 17 (TYO): Nagaland nung tang mezüng atema Officers Hill Youth Organisation (OHYO) Kohima-i mapatong ka tenzükogo aser ibaji ‘Smart Colony: GIS and 3D Map’ lir.
Honibar nikongdang Hotel Urra, Officers Hill Kohima nung Kohima Deputy Commissioner, Rajesh Soundararajan-i tongti tesemdanger ama shilem agia iba mapatong tenzüktsü.
Iba mapatong ya sorkar aser nübortemi külemi inyakba ka lir. Iba mapatong ajanga sensotem indang address den talidak tejangja agütsütsü aser ibaji ajanga nüngdakba public services timtem melii sensotem talidak atongtsü.
Iba mapatong kübok Officers Hill Kohima nung lanurtemi parnok kiyong nung aliba kilen 996 semdang aser talidak tesemtem jangjashi. Iba sülen parnoki geocode map ka yanglu aser iba nung digital address database dena lir.
Iba Zero budget project ya OHYO volunteers 18-i hopta asem tsüngda tembanga inyak.
Tanü Kohima DC Soundararajan-i mapatong tenzüktsüdang, tanü putu nung nisungtemi technology dang nungi pilaa melitettsü kechiyong asenok taküm nung iba ya tongtipang shilem ka ama kümogo, ta ashi.
Asenoki technology amshi metettsüla aser asenoki anogoshia liyonga aodang, iba teyari ajanga asen nüngdaktem peridaktsütsüla, ta paisa ashi.
Officers Hill lanurtemi iba mapa inyakba atema Soundararajan-i tenüngsang agütsü aser iba ajanga lanurtemi loktiliba nung temelenshi bener arutettsü tashi lir ta kuli agütsür, ta paisa ashi.
Iba mapatong ajanga asen state renloktsü aser tejakleni aotsü atema inyakba maparen nung teyari tulu angutsü. Maneni iba ajanga smart city asoshi renemba nunga teyari tulu angutsü, ta paisa metetdaktsü.
Tanga telok aser kiyongtemia iba mapa tajung ajizüka inyaka aotsü imlar aser Kohima ya planned City ka kümdaktsütsü atema inyaktsü ayongzüker, ta Soundararajan-isa shisem.
Iba mapatong atema team leader Yanpvuo Kikon-i o jembidang ashiba agi, iba ajanga nisungtem talidak melamela ngutettsü aser city planning o administration nunga teyari angutsü.
Iba ajanga postman, courier companies, taxis, citizens, tourists temi parnok indang mobile phones aser apps amshia address mashii kati otettsü, ta paisa ashi.
‘Smart Colony: GIS and 3D Map’ ajanga Officers Hill aser Kohima nung Smart Colony tem kümdaktsütsü. Iba ya Nagaland nung mezüngbuba lir aser tang nungi House Number mesüra Google ID mesüra House Owner’s name ajanga home delivery melamela sütettsü. Maneni www.nagalandaddress.in website nung ki melamela angutsü, ta Kikon-isa metetdaktsü.
Nagaland nung geocoded postal addressing system ji Nagaland State Address Geoportal System with GIS & remote Sensing Center, Nagaland ajanga inyaker.