Küm 3 anünga lia McDonald-i Olympic Sponsorship tembangogo

June 17, 2017: U.S. fast-food giant, McDonald-i küm 41 tashi International Olympic Committee (IOC) den official sponsorship inyakba sülen küm asem lia tezüngzüktep tembangogo, ta IOC-i metetdaktsü.
1976 küm nungi tenzüka Mc Donald-i sponsor süa arur aser IOC indang top sponsors programme nung shilem agia aru, aser parnoki Olympic Games atema küm pezü shia sen US sen billion ka dak tema agüja arur. Iba tezüngzüktepji 2020 küm tashi aser Tokyo summer Olympics tashi liasü.
IOC Television and Marketing Services Managing Director, Timmo Lumme-i sangdong ka ajanga, “Shiushilembaba nung kanga temelenshi aliba tanü ama putu ka nung, McDonald-i tanga business nung tongtibangsüa rangloker südi ta onoki angateter,” ta metetdaktsü.
“Item kuli nung ajemdaker McDonald den onok pilatsü atema onoki mulungogo,” ta paisa ashi.
McDonald Global Chief Marketing Officer, Silvia Lagnado-ia, “Aliba nung onoki business ainba dak sendakba nung onoki onok shishilembaba lenla ajaklen asadanga tanga nüngdaktem nung rangloktsü atema onoki IOC den amalitepa iba telemtetba agi,” ta metetdaktsü.
McDonald-i mezüng 1968 küm Olympic Games nung shilem agia densema liasü. McDonald-i iba contract tembangaka parnoki maneni sangküm Pyeongchang winter Olympics nung sponsor shilem agitsü.