Centre-i sorkar mapa inyaker 67,000 mapa asadangtsü

New Delhi, June 18 (Agencies): Centre sorkari IAS aser IPS ketdangser densema sorkar mapa inyaker 67,000 indang service records asadanga reprangtsü tenzükogo.
Nüburtem tenzükba mapa tajungba akümtsü aser yimsüsüba jenjang tajungba akümtsü nükjidong nung Centre-i iba telemtetba agi.
Department of Personnel and Training (DoPT) nung tongti ketdangser kati, iba maparen tembangba sülen mapa junga meinyakertem nembo temerenshi agüja tembangtsü, ta ashi.
“Mapa junga meinyakertem jangjatsü atema Centre sorkar mapa inyaker nisung 67,000 indang service records reprangtsü,” ta paisa ashi.
Parnok rongnungi nisung 25,000 shibo Indian Administrative Service (IAS), Indian Police Service (IPS) aser Indian Revenue Service (IRS) densema Group A services nungi lir, ta ketdangserisa ashi.
Osangbeneri Minister of State for Personnel Jitendra Singh den jembidang minister-i, iba maparen ya, külen mapa junga inyaktsü, aser ano külen ochimashi nokdangtsü atema lir, ta ashi.
Singh-isa, NDA sorkari tesüiba küm asem yimsüsüba mapang nung transfer policy, Leave Travel Concession ama nung ozüng aika melenshiogo, ta ashi.
Tesüiba küm ka kija nunga Centre sorkari IAS aser IPS ketdangsertem densema mapa junga meinyaker nisung 129 mapa nungi anentsüogo.
Sorkar inyakyim nungbo, sorkar mapa inyaker ka mapaji anaben dang reprangshir. Sorkar mapai aiba sülen küm 15 nung khen aser küm 25 sülen khen reprangshir.
Tang linük nung Centre sorkar mapa inyaker nisung 48.85 lir.