GST asoshi Retailer tem renemshidar

Mumbai, June 18 (Agencies): Goods and Services Tax (GST) amenokba ajanga aikati shishilembaba nung kongshitsü ta bilemer saka Organised retailer temi iba tax tasenba ajanga parnok shishilembaba nung kongshitsü meimlar aser iba atema ang renemshir alitsü asoshi inyakdar.
“GST koba July 1 nungi tenzüka mapa küma inyaka aotsüba lir iba atema onok renema alitsü nüngdaker. Iba ajanga mapa inyakyim nung liromedema akümtsü,” ta Reliance Retail, chief financial officer Ashwin Khasgiwala-i osangbenertem dang ashi.
“Onoki onok yokyatsüya nung iba ajanga kongshitsü meimlar. Shingaia iba dak sendakba nung tebilemtsü kaa lemsatepa mali. Retailer tem atemabo tajangzükji osettsüset yanglurtemi parnok oset jenjang melenshidang dang adoktsü koba onoki maneni talirtem nem melenshir agütsütsü,” ta paisa ashi.
July nungi tenzüka retail company tulu Reliance Retail, Future Group, Trent HyperCity aser DMart amalai osettem nung jenjang kanga ajemtsü imlaa atar.
“Onoki oset jenjang shilem 2 nungi 20 tashi ajemer agütsütsü,” ta Future Group, chief executive, Kishore Biyani-i ashi.
“GST ajanga shishilembaba nung liromedema akümtsü,” ta pai shisemba den külemi parnok atema onük tongtibang kaji customer tem temolung südaktsütsüla, ta ashi.
tang tashi nung retailertem aika input tax credit aser e-way bills amala inyakyim nung keno mejangjai angatetnüa lir.
Maneni retail store tem aikati GST mamenok tsüngda parnok osettem talisa electronics amala nung jenjang ajemba sangdongogo.