June 23 matongdang BJP-i Tir candidate sangdongtsü

New Delhi, June 18 (Agencies): Deobarnü Bharatiya Janata Party (BJP) lenir aser Union Minister, M. Venkaiah Naidu-i, June 23, 2017 nü tashi nungbo party-i linük Tir candidate tenüng sangdongtsü, ta metetdaktsü.
Tanep Naidu-i phone ajanga Union Food Minister, Ram Vilas Paswan den Tir election atema o lemtepa liasü.
Naidu-i, “Iba telemtetba yakta agitsü aser June 23 nü tashi nungbo Tir candidate tenüng sangdongtsü,” ta metetdaktsü.
Paisa, “Paswan temang anepalutsü atema London-i ogo, aser pa arutsü atema onoki atatepdar. Tir election dak sendakba osang ajak ni pa nem metetdaktsüogo. Ato kilonser, Modi-i kechi lemtetdir ibaji ajaki agizüktsü ta pai shiogo,” ta ashi.
Iba sülen pai Union Home Minister, Rajnath Singh-a ajurua liasü.
Hokolbarnü Rajnath aser Naidu nati Communist Party of India (CPI) lenirtem- D. Raja aser Sudhakar Reddy na ajurua Tir election atema jembia liasü.
Ano külen tanaga osang ka nung, tanü BJP Tir, Amit Shah-i Shiv Sena tongti lenir, Uddhav Thackeray ajurua Tir election atema jembi.
Shiv Sena osang ka ajanga ashiba agi, Shah-i Thackeray dang, Ato kilonser, Narendra Modi-i NDA nungi Tir candidate shimtsü ta metetdaktsü.
Ibaji langzüka Thackeray-i, BJP-i tenüng sangdongba sülen ang Shiv Sena-i candidate ji nungittsü asü menungittsüar telemtetba agitsü ta shiogo, ta kasa osang ajanga shisem.
Taoba mapang Tir election ana nungbo Shiv Sena-i Congress Party-i shimba candidates- Pratibha Patil aser Pranab Mukherjee pusema liasü.
Taruba Tir election July 17, 2017 nü agitsü aser tang teinyakdak Tir, Pranab Mukherjee July 25 nü Tir menden nungi anisüngzüktsü.