Karbi council election nung nüburtem shilem 70-i shilem agi

Nagaon, June 18 (Agencies): Karbi Anglong Autonomous Council election nung nüburtem shilem 70-i vote agütsüogo. Tsüngsang mejungi anogo tepeyong tzünglu aruaka nikongtsütsü 4 ako tashi nung nüburtem aikati arua shilem agiogo.
Ajisüaka Karbi Anglong district headquarters, Diphu nung tzünglu medangi aruba ajanga voter tem aikabo maru.
“Lumbajong primary school nung 10:00 ako tashi nung nisung 20-i dang vote agütsür liasü. Tzünglu tera anenba sülenang nüburtem vote agütsütsü asoshi nokdak,” ta district ketdangser osang ka ajanga metetdaktsü.
West Karbi Anglong nunga polling station 257 nung voter tem tzünglu aruba ajanga 11:00 ako tashi kanga azünga liasü.
Autonomous council constituencies 26 nung vote anepdang 8:00 ako nungi agütsü tenzük.
BJP’s chief executive member, Tuliram Ranghang-i Bithung Rengthema High School nung pa indang vote agütsü aser Diphu legislator Sum Ranghang-i par kibong den külemi Raja Pathar High School nung vote agütsü.
“Ni ochishiba aser nüburtem meimba yimsüsüba yimya ka aginer. Ni inyakyim nung temelenshi ka atema vote süogo,” ta Bithung Rengthema nungi arishi küm 19 tain Larsika Englengpi-i ashi.
Englengpi ya tangang mezüngbuba vote agütsür aser West Karbi Anglong district nung terenlok bener arutsü asoshi temelenshi ka nüngdakba pai lemsatep.
Iba election nung Hills State Demand Committee (HSDC), Congress aser BJP tongti tetoktepertem liasü.
Autonomous State Demand Committee (tang HSDC)-i 1986 nungi 2001 tashi yimsüsüa liasü. 2001 küm HSDC nung telemsa adokba sülen 2001 küm Congress-i yimsüsüba menden kümteta liasü.
Yaküm June ita Congress nungi züngsem 15 aser HSDC nungi züngsem 6 ta BJP nung aden aser BJP-i aniba sorkar ka kümtet. Küm ka jakdang Congress lenirtem BJP nung adenertem atema iba ya mezüngbuba election lir.
Election osang June 22 nü agütsütsü.
Polling station 379 nung election kanga sunepa agiogo, ta Karbi Anglong deputy commissioner Adil Khan-i metetdaktsü. “EVM tem June 22 tashi kanga junga rizünga ayutsü,” ta paisa ashi.