Karnataka nung tenük-telen tenlatsü atema Aadhaar nüngdaktsü

Bengaluru, June 18 (Agencies): Karnataka sorkari, temang shilem, tenüktelen tenlatsü atema nangzükertem indang Aadhaar nüngdaktsü, koba ajanga ketdangsertemi tenüktelen tenlartem tenüng züluoka yur tenlartem kinüngertemi ashishidang kuli agütsütettsü, ta metetdaktsü.
Iba ozüng tasenba ajanga tenüktelen tenlatsü atema mapang kümzüktsü aser nisung aika kümzüktettsü, ta state Health Ministry Principal Secretary, Shalini Rajneesh-i metetdaktsü.
Iba ozüng ajangasa, asür kati tenüktelen tenlatsü atema nangzüker asü menangzükar ibaji melamela jangjatsü, ta Shalina-isa ashi.
Rajneesh-i ashiba agi, nisung aikati parnok sür sülen tenüktelen tenlatsü atema nangzükbaji par kinüngertem nem memetetdaktsür, ajisüaka Aadhaar nung biometric osangtem ajanga ibaji melamela inyaktettsü.
Osang ajanga angazükba agi, Deobarnü Guiness record yanglutsü atema nisung 1,500-i yoga aidang iba atema mapatong ka tenzüka parnoki Aadhaar osangtem agütsüogo.
Parnokisa World record ka yanglutsü atema temang tenüktelen tenlatsü asoshi tenangzükba agiogo.
Hokolbarnü Union sorkaria bank account tasen lapoktsü aser sen 50,000 dak tema transaction atema Aadhaar nüngdaktsü, ta metetdakja liasü.
Ano tamalen bank account lapoka alirtem danga taküm December 31 nü tashi nungbo bank tem nem Unique Identification Authority of India (UIDAI)-i agütsüba Aadhaar number agüjang ta metetdaktsüogo. Iba anogo tashi nung Aadhar number magütsürtem indang bank account ji magila akümtsü ta sorkarisa metetdaktsü.
Sorkar nem saru magütsütsü nükjidong nung nisungtemi PAN card ka dak tali amshiba nokdangtsü atema sorkari General Budget 2017 nung Aadhaar number den Permanent Account Number (PAN) sendakteptsü atema benoka liasü.