Kangpokpi nung tetsür lokti-i longkak ait

Imphal, June 18 (Agencies): Kangpokpi Women Welfare Organization kübok kin aser lokti balala nungi tetsür noklang aika sentepa tanü district yimtiba nung ozüng alema rakzükraktemba aser takhangba tem anema mener longkak aitba sentong ka agiogo.
Tetsür lokti ya tanü anüngdang 11 ako shi nung adenshia, sorkar ketdangsertem, kicha, shishilembartem aser highway maintaining agencie tem dang sen akhangba ken o nung tatsü talang asateba o lemtepa liasü.
Iba sülen parnok Kangpokpi jila nung shishilembaba tongti tesemi ao aser idakji district nung telungpurtemi lokti anema maparen balala inyakba parnoki aitsür, ta sayua mener longkaka aitaba sentong ka aka.
Shishilembaba tesem nung dokan, hotel aser tanga shishilembadak ajak shibanga liasü. Tetsür lokti-i placard nung onük balala zülur longkak ait.
Osang ka ajanga ashiba agi, nokdanga aliba telungpurtemi forest aser power department tem den külemi highway maintenance agencies, shishilembartem aser ano nisung kar dang nungi sen meshia liasü.
Maneni telungpurtemi forest aser power department dang nungi sen lakh metsütsü akhanger aser shishilembartem dang nungi mapang aben sen 1500 nungi 4000 tashi akhangba kasa osang ajanga metetdaktsü.
“Telungpurtemi onok mapangshia amokmerener. Onok yimjung nung meliteter aser timba ka atsüka dang alir. Onok parnok kabuma nung kanga kangshir aser tangar ama sunepa meliteter,” ta shishilembar kati ashi.
Kasa mapang nung Kangpokpi Women Welfare Organization-i iba tesem nung aliba telungpurtem dang ozüng alema sen akhangba aser rakzükraktemba anentsü asoshi metetdaktsüogo aser parnoki teka amteper meinyakra tetsür lokti-i iba anema maneni nokdaktsü ta amokmeren.
Maneni tetsür lokti-i department ketdangsertem, shishilembartem aser nüburtem dang tarutsü nung Kangpokpi nung telungpurtemi parnok dang nungi sen khangra idangjisa KWWO nem metetdaktsütsü asoshi mepishe.
Maneni iba lokti ajanga lanurtem jila nung kecha kuli melei aonung menoa mesenzütsü asoshi tekümdangtsü agütsü.