Uttar Pradesh nung Khristantem dak tashiyim mapa inyaker

June 18, 2017: India kübok Uttar Pradesh state nung Hindu nungertemi Khristan yimdaklir kar tashiyim agi Hindu külemküja südaktsü aser tzü magütsür, ta osang ka ajanga ashi.
Ghazipur district kübok Jalalabad nung yimdaklir kibong pezü dak iba mapa ya inyak aser parnok alu aliyimtsü atema tzü magütsür.
“Tsünüsenbongtsü anepalu mesütetra, onok kodaser alitsü?” ta Sasikala Kumari-i osangbener dang ashi.
Yimtsüng nung mendenbuba aser police temi Hindu nunger nem parnok alui bener aoba tzü shibangtsü temelaba agütsüogo, ta laisa ashi.
April 25, 2017 nü Hindu nungertemi Manoj Kumar, pa kinungtsü Pushpa Kumari aser Khristan apunani asem dak züka merenshi. Parnoki Hindu nunger Khristan yimsü dangi meyipdaktsür ta tai tonglokja merenshi.
“Yimtsüng mendenbubai anir telok jagi onok nem tashiyim agi gangajal (Ganga ayong tzü) jemdaktsütsü, Hindu nunger atema temeshi ta züngshiba tulsi tou achitsü aser onoki Khrista magizüker ta shidaktsütsü merang” ta Pushpa Kumari-i osangbener dang ashi.
“Onoki parnok dang ma ta ashidang, parnoki onok dak tali züka merenshi” ta laisa shisem.
Apuani pezü den tanga tamanger pezüi Hindu nunger külemküjaba meinyaktsü aser Khrista mesentoktsü atema tekong meranga nokdak. Ajisüaka, Khristan lanur 13-ibo Hindu nunger külemküja asütsü aser Khrista sendoktsüsa aküm, ta parnokisa metetdaktsü.
Khristantem jagi Dullapur police station nung ken o ka benoktsü atema ao saka yimtsüng mendenbuba Santosh Kumar Gupta-ia police station-i aru aser parnok dak tashiyim amshia tamangba yimsü melendaktsüba ken o benok.
“Yimdaklirtemi onok anema nokdak, onoki tashiyim agi temulung meyipdaktsür ta parnok tiyazü nung tai tongloktsü. Police-i yimdaklirtem dang pei Dharma (tamangba yimsü tesayuba) sülen anidaktsü akok aser tenlakidang timtem magütsütsü ta ashi” ta Manoj Kumar-i osangbener dang metetdaktsü.
Yimtsüng mendenbuba lia Hindu yimertemi police-i ashiba ama inyaktsü ta nangzük aser iba jagi telok anaprongi ken o mebenok. Ajisüaka, iba tenangzüktep nung water service indang dena maliasü aser iba jagi yimdaklirtemi Khristan pur nem tzü magütsür.
“Iba jagi onok nem tzü magütsür. Onoki tzü indang taa agütsütsü mulunga lir, saka yimtsüng mendenbuba aser tanüngba yimdaklirtemi onok nem tzü magütsür. Onok indang alu kongogo” ta Manoj-isa shisem.
“Onoki yimtsüng mendenbubu’er kidangi anaben tashi ogo, saka pa kinungtsüi onok merenshirtem kidangi anir arung aser iba sülenji khuretji bentettsü ta ashi, saka onoki kechiba parnok anir aotsü” ta Pushpa Kumari-ia ashi.
June 14, 2017 nü Khristantemi yimtsüng mendenbuba dangi ao saka pai, “Nenok alii alutsüla. Yimtsüng nung külemba anentsüla. Khrista sülen manidaktsüla aser iba sülen jiang nenok nem tzü agütsütsü” ta ashi.
May 2014 nungi Prime Minister Narendra Modi-i sorkar ketdangsütsü tenzükba sülen, Hindu nationalist telok- Bharatiya Janata Party (BJP)-i aniba National Democratic Alliance sorkari Hindu nunger masürtem anema mapa inyaktsü tenzük.
Parnoki sorkar akümba sülen India kübok tesem aika nung Hindu nunger tali bilemloka oa amangertemi telok tilatem reshikangshir.