Assam Police nung nisung 9,000 shimoktsü

Guwahati, June 18 (Agencies): Assam Police-i, tang state police nung mapa tazüng 12,000 lir, aser taküm küm tatemlen tashi nung nisung 9,000 bo police force nung shimoktsü, ta metetdaktsü.
Honibarnü State Level Police Recruitment Board chairman aser Director General of Home Guards, Pradeep Kumar-i, “Tang non-gazetted officers post 12,000 tazüng lir, item rongnungi post 8,000 bo constable ranks lir. Iba dak alia DSP post 79 aser inspector ranks 154 tazüng lir,” ta metetdaktsü.
Paisa, taruba ita tashi nung post 3,980 nung nisung shimoktsü, ta paisa shisem
“Sorkari onok dang post balala atema nisung 5,013 shimoktsü asüngdangogo. July-August ita nung onoki item post atema advertisement agütsütsü aser iba maparenji taküm küm tembang tashi nungbo tema inyaktsü,” ta Kumar-isa ashi.
“Onoki recruitment policy tasenba atar. Onoki temelenshi kar benokogo, aser item rongnung backward tesemtem atema shilem 10 shiteta yutsütsü, sports atema shilem ana shiteta yutsütsü aser temai adokba telungpur atema shilem ana shiteta yutsütsü densema lir. Tang tashi nung sorkari iba atema telemtetba agia mali,” ta paisa metetdaktsü.
“Onoki Centre dang India Reserve battalions asem tentettsü asüngdangogo. Ibaji agizükra police force nung sepai 3,000 tali bendenloktsü,” ta paisa shisem.
Assam Police nem nisung 74,000 lemzükja lir, aser iba nungjagi post 12,000 bo tazüng lir.