Sorkari Vocational Training College 40 lapoktsü: Manipur CM

Imphal, June 18 (Agencies): Manipur Chief Minister, N Biren Singh-i principals aser tesayurtem dang state nung sorkar kaket rijutem ajungkettsü atema kanga meranga inyakdaktsüner, ta metetdaktsü.
Board of Secondary Education, Manipur (BOSEM) aser Council of Higher Secondary Education, Manipur (COHSEM)-i ketdangsüa agiba class 10 aser 12 tatidang nung toppers nem sempet agütsüba sentong nung jembidang Singh-i, “Tanü-asüngbo state nung tsüraburtemi tanurtem shisaliok atema sen jenti indoker,” ta ashi.
“Iba ya, talisa coaching aser tuition agiba sobaliba tenzükba den külemi sorkar rijutem jenjang mejungi akumba ajanga lir,” ta paisa shisem.
Chief Minister-isa, sensakertemi sen kanga meindoki parnok chirnurtem nem shisaliok tajung agütsüner, ajisüaka sorkar rijutem jenjang mejungra ibaji mataloktsü,” ta ashi.
“Health aser infrastructure/communication sector dak alia sorkar tasenbai shisaliok sector nunga nendaka inyaker, ajisüaka tesayurtemi meranga meinyakra ibaji tamakok ka asütsü,” ta paisa ashi.
Education sector ajungkettsü nükjidong nung state sorkar tasenbai anogo 100 sentong nung school 50 züngokogo (SSA kübok school 41 aser RMSA kübok school 9).
Kobi melii sorkari vocational training college 40 lapoktsü sentong lir, ta metetdakja chief minister-i, item course nung school züngtur anenertema züngoktsü atema jembidar, ta metetdaktsü.
“State nung school züngtur anener jenti lir aser iba ya ajanga mapa manguba tebilemtsü tuluba kümdaktsür,” ta paisa ashi.
CM-isa, sorkari kobi melii Imphal East district atema District Institute of Education and Training (DIET) centre ka amenoktsü, ta metetdaktsü.
“Tekaraba nung Directorate of education kübok tesayurtem aser rijutem nung tekolakpurtem transfer asütsü atema maparen ka tenzüktsü,” ta paisa metetdaktsü.
“Shisaliok asüngsashitsü aser nija school tem den coaching centre aika lapokyonga aoba azüoktsü atema taruba assembly senden nung Manipur Private Schools (Registration) Bill, 2017 aser Manipur Coaching Institute (Control and Regulation) Bill, 2017 benoka jembitsü,” ta pai metetdaktsü.