Saada shishilembadak nisung 25 tepset

Shada, June 18 (Agencies): Saudi Arabia-i aniba teloki tayimtsü amshia northern Saada province nung shishilembadak tesem ka amakba mapang Yemen nunger civilian 25 tepset, ta iba tesem nung aliba ketdangser ajanga ashi.
Saudi arrtsü anasa aliba Shada district nung al-Mashnaq shishilembadak tesem nung tayimtsü ajanga Deobarnü anaben amak, ta Saada nung Houthi indang health department office Director-i ashi.
“Iba lendong adalokba sülen anu prangbong tulu amshia amaktsü tsübuba ajanga mapang talangka iba tesem-i ketdangser tem oa meyaritet,” ta Dr Abdelilah al-Azzi-i telephone ajanga osangbener dang Deobarnü ashi.
Saada nung iba lendong adalokba ya Yemen nung aliba osangbener temia metetdaktsüogo.
Saka iba osang asoshi Saudi-i aniba telok ketdangsertem den anu mejembiteti lir.
Saudi-i aniba coalition ajanga iba sensaker linük nung Houthi telungpur anema tayimtsü amshia küm ana dak tali rara-a arur.
Iba linük nung rara agi sünger lir aser linük nungi meindoker aliba sorkar nung tir, Abd-Rabbu Mansour Hadi ya Saudi-i aniba mitkar temi yaria iba linük nung tanaben yimsü asütsü asoshi Iraq den tesendaktep aliba, Houthi telok den rara-a arudagi. Northern Yemen ajunga aser Yemen yimtiba, Sanaa ya iba Houthi telok ajanga amokbanga lir.
Saudi-i aniba teloki Yemen anülulen Temerem Tzüyim (Red Sea) anasa aliba Khoukha jila nung tayimtsü amshia March ita amakdang nisung 22 tepset aser aika yirua liasü.
Yemen nung raraba mapang nisung 10,000 dak tali taküm samaogo aser nisung million asem dak tali tesem balala-i prokshiogo.
Houthis aser taoba Yemen tir, Ali Abdullah Saleh busemer den raratsü asoshi Saudi-i aniba telok ya 2015 küm tenteta liasü.
Yemen indang province 22 nungi tesadang ka nung ayawara arutsü ana nung lir, ta UN World Food Programme ajanga March ita sangdonga lir.