Portugal morok mi nung nisung 62 asü

Coimbra, June 18 (Agencies): Portugal nung morok mi lendong adokba ajanga tanur pezü densema nisung 62 taküm sama, ta sorkar ketdangser ajanga ashi.
Coimbra nungi south-east tsütsü kilometre 50 orr aliba, Pedrogao Grande tesem nungi ajentsü merangba mapang asür timba liasü, ta Portugal sorkar ajanga ashi.
Iba morok mi anendaktsütsü asoshi firefighter aika tesem balala nung mapa balala inyakba mapang lir.
Morok mi lendong rongnung ibai tulutiba asütsü, ta Portugal Ato Kelonser, Antonio Costa-i sangdong.
Iba lendong nung nisung asür ya anu alitsü südi, keciyong nisung aika mangu bushitepba mapang lir, ta pai shisem. Deobarnü nungi tenzüka anogo asem linü mangyim alitsü sorkar ketdangser temi sangdongogo.
Iba lendong nung asür nisung timbaka mokozü saokba aser mi agi arungba ajanga lir aser nisung ana iba lendong den sendaktepa lenmang nung accident süa asü, ta Secretary of State for the Interior, Jorge Gomes-i ashi.
Gari telung nung nisung tasümang 30 ngutet, tasümang 17 gari anasa angu aser tasümang ka IC8 motorway nung ngutet, ta pai-sa ashi.
Iba lenmang anasa aliba yimtsüng ka nung nisung 11 tasümang ngutet.
Firefighter noklang aika den gari 300 tashi iba morok mi remseptsü merangba mapang ka lir, saka iba mi kanga tulu asüba ajanga kanga mela bo iba morok mi meremseptettsü, ta Portugal nung aliba osangbener temi ashi.
Iba mi lendong nung arishi küm 8 tain tetsür ka densema yiru aser la ya mi anasa arem nung nemzüa senzüa aliba ngutet, ta kasa osang ajanga ashi.
Iba mi lendong nung firefighter trok kanga mejungi yiru aser ana samar aliba, yirur lia ngutet, ta sorkar osang ka ajanga ashi.
Tesem aika nung ketdangser temi osang magiteter, aser item tesemtem nung asür alitsü südi, ta kasa osang ajanga ashi.
Portugal nung morok mi tesem 60-shi nungi tenzük aser iba mi remseptsü asoshi firefighter 1,700 jungnüa oa lir.
Iba morok mi remseptsü asoshi Spain nungi ‘water-bombing’ tayimtsü ana yok aser European Union ajanga international firefighter aser teyari balala agütsütsü asoshi osang agitepba mapang ka lir.
Iba mi lendong adokdaktsüba kuli tejanga memetet, saka tsüngi ajanga adokdaktsü südi, ta Ato Kelonser-i ashi.
Portugal nung tesem kar nung kanga tatsük lir aser temperature 40ºC (104F) tashi lir.
Taoba küm 20 tejaklen iba ama morok mi lendong adoka liasü, saka tang adokba ya tesashiba lir, ta sorkar ketdangser temi ashir.
Iba morok mi adokba tesem ya arem min lir aser kanga takong lir. Iba ama tsüngsarosa nung tsüngi ajanga mi adokdaktsütsü lenmang sadema lir, ta ketdangser ajanga-sa ashir.