Angh Acharya-i Naga kaketshir lennir aser entrepreneur tem den ajurutep

Dimapur, June 18 (TYO): Nagaland Angh, P.B. Acharya-i Nagaland House New Delhi nung kaketshir lennirtem aser Naga entrepreneur tem den ajurutepa senden ka amen.
Iba mapang Angh Acharya-i Naga kaketshir lennirtem aser entrepreneur telok ayongzüka jembidang, “nenok kija mesüra union/telok atema masü saka nenok ajak ya asen state atema ambassador ka ka lir” ta ashi.
“Nenok yangi Delhi nung alibaji jenjang tajung ka lir. Nenok kaketshir mesüra shishilembar temi state aser centre atema Nagaland House ya tongti tesem ka ama amshiang” ta Angh-isa ayongzük, ta Nagaland House New Delhi, P.R.O. Kuolie Mere-i sangdong ka nung metetdaktsü.
“Nenoki nür state – Nagaland ya linük nung tepelatiba state ka kümdakjang. Ni nenok den ni akokba ajak agi yariteptsü mulunga lir” ta paisa ashi.
Angh-i parnok den ajurutepba atema kaketshir lennirtem aser entrepreneurs teloki pelaba metetdaktsü. Parnokisa Angh den Father’s Day salem lemsatep, ta sangdong nungsa shia lir.
Iba senden nung Resident Commissioner Nagaland House New Delhi Abhishek Singh, Deputy Secretary to Governor George, ADC to Governor Maj. Abhishek Biwas aser Nagaland House New Delhi PRO, Kuolie Mere nungertem aden.