Rajasthan nung aluyimertemi June 20 nungi longkak aittsü

Udaipur, June 18 (Agencies): Rajasthan sorkari state nung aluyimertem atema meinyakba nung ajemdaker Deobarnü aluyimertem tentet, Bhartiya Kisan Sangh (BKS)-i, parnoki state sorkar anema June 20, 2017 nungi state tesem ajaklen longkak aittsü, iba den külemi state nung aluyimertem market (mandi) shibangtsü, ta metetdaktsü.
Osangbener den jembidang BKS state general secretary, Kailash Gandolia-i, parnoki akhangbatem meinyaktsüba anema parnoki Vasundhara Raje Scindia-i aniba sorkar anema longkak sashia aittsü, ta metetdaktsü.
“Iba sorkar ya temulung teküprak. Onok tebilemtsü onüktem atema parnoki tejembia mejembir. Yimtsüng ajak nung aluyimertem market shibangtsü aser lenmang nung longkak aittsü. Iba maparenji June 20 nungi tenzüktsü,” ta Gandolia-i ashi.
Paisa, mepetmesü kar danga atalokra iba longkakji tesashiba aittsü, ta amokmeren.
Osang angazükba agi, sorkari Minimum Support Price (MSP) agi mustard alitsü memelungba ajanga parnoki longkak aittsü lemtet.
Iba dak alia aluyimertemisa loan atoktsü atema akhanger.