Kerala nung wara balala agi taküm nisung 103 süogo

Thiruvananthapuram, June 18 (Agencies): Taküm küm tenzüker Kerala nung wara balala agi nisung noklang ka dak tema asüba sülen tanü state sorkari nüburtem dang sorkar indang merükmejuba mapatong nung shilem agitsü ayongzükogo.
Health Department osang ajanga ashiba agi, taküm January ita nungi tenzüka tang tashi nung state nung H1N1, leptospirosis aser dengue densema wara balala agi tanur aser tetsür densema nisung 103 süogo.
Tasürtem rongnung nisung 53 H1N1 agi aser dengue agi nisung 13 asü.
Wara aser menatepba tashidak prokbaji talisa, jana bendena ayuba ajanga merla aika poktetba agi lir, anungji tashidak balala nokdangtsü atema merükmejua alitsüla, ta Chief Minister, Pinarayi Vijayan-i ashi.
Sangdong ka ajanga Vijayan-i, “Yimtenren party nung inyakertem, lokti tenzükertem aser club balala nungi züngsemtemi merükmejuba mapatong nung shilem agitsüla,” ta ashi.
Merükmejuba mapatong nung shilem agiba tesemtem nungbo wara balala ajema kümogo, ta paisa metetdaktsü.
Paisa ashiba agi, sorkar hospital ajak nung nüngdakba mozütem aser doctor peria alitsü atema sorkari tetuyuba agütsüogo.
Ano külen Opposition lenir, Ramesh Chennithala-i tanü Vijayan ajurua iba tebilemtsü koktettsü atema tezüluba nung onük kar agütsüogo.
Chennithala-isa, health department-i item wara nokdangtsü nung tamakok nguogo aser state Health Minister K K Shylaja-i iba atema kecha meinyaker, ta aitsüogo.