Modi sorkari nashi tepsetba nokdangtsü: Swamy

Mumbai, June 18 (Agencies): Deobarnü BJP lenir, Subramanian Swamy-i, linük tesem ajunga nung nashi tepsetba nokdangtsü atema Modi-i aniba sorkari ozüng ka benoktsü, ta metetdaktsü.
‘Bos Indicus: The Glorious Indian Cow’ ta ser Virat Hindustan Sangam (VHS)-i ayongzükba senden nung jembidang Swamy-i, “Tangbo ozüng tejangja ka mali, ajisüaka ano onoki yimsüsütsü küm ana anünga lir. Iba sülen ano küm pongu yimsü asütsü akok, anungji linük nung nashi tepsetba ozüng ka latettsü,” ta ashi.
VHS ya Swamy-i tentetba telok lir.
“Kuli aika atema asenoki nashi kümzüka ayutsüla,” ta paisa ashi.
Iba senden ya Bombay Stock Exchange (BSE) aser Iskcon nati senteper ayongzüka liasü.
Swamy-isa, nashi kümzüktsü aser Gaushalas yanglutsü atema senotsü peria agütsütsü, ta ashi.
“Asenoki nashi kümzükertem jenjang ajungkettsütsüla aser parnok nem certificate agütsütsüla, koba ajanga shingaia parnok menokdangtsü aser lenmang nung tepsettsü. Rara tatalokbatem ajak tu ozüng alema benshirtemi lir. Gau-rakhshaks-i mapa tajung inyakdar aser gau-rakshaks tasen tentettsü,” ta pai ashi.
“Supreme Court-i, nashishi achitsüji Islam yimsü shilem ka masü ta aiben shiogo. Nashi shi achiba nokdangtsü ozüng latettsü atema ozüng kechaia asenok menokdangtettsü,” ta paisa ashi.
Rajya Sabha züngsem, Swamy-isa, taoba Congress sorkari subsidy balala ajanga nashishi bendangleni yokba nungita liasü, ta aitsü.
“Nashishi bendangleni yoktsü atema Congress sorkari subsidy tapu 13 agüja liasü, ajisüaka ozü sorkar aruba sülen itemji ka ken ka khen ta anentsü, aser ibaji ajanga nashishi tangaleni yokba jenjang ajema alu,” ta pai ashi.