Nüburtemi ni McGregor den tsüngtepdaktsüner: Floyd

Los Angeles, June 18 (Agencies): Nüngtugu boxing asayar Floyd Mayweather-i ashiba agi, pa boxing asayaba nung anener liaka tanaben asaya nung shilem agia mixed martial arts asayar Conor McGregor den tsüngteptsü asoshi kecha tebilemtsü mali. Iba asaya ya karibo boxing asayaba otsü nung sen timtiba aaba asaya ka asütsü ta takzür.
“McGregor ya tetokteper tajangka lir. Alima ajunga nungi nüburtemi iba asaya akhanger anungji parnoki reprangnüba ama parnok nem reprangdaktsütsü,” ta Mayweather-i Honibarnü osangbenertem dang ashi.
Bodhbarnü tena asayatsüba osang sangdongba sülen iba ya yimjak nung Mayweather-i mezüngbuba jembiba asütsü. Iba asaya ya August 26 nü US boxing capital Las Vegas nung asayatsü.
Arishi küm 40 tain Mayweather 2015 küm September ita Andre Berto akokba sülen boxing asayaba nungi anenadok. Pa boxing asayaa aruba nung 49 ben asayaba nung khen danga tamakok ngua mali aser tang McGregor den asayatsü aliba ajanga pa nem asaya 50ben buba akoktsü asoshi maongka bener arutsüogo.
Iba asaya nung senotsü dak sendakba nung asüngdang dang Mayweather-i lokti anaprongla temolung süogo ta langzü. “Telok anaprongla kanga pelar. Pa kanga pelar, nia kanga pelar aser asayatsü asoshi matateter,” ta Mayweather-i ashi.
Ajisüaka boxing nung mongintemi iba asaya exhibition asaya ka amai dang lir ta shia aitsüogo. Parnoki ashiba agi, arishi küm 28 tain McGregor-i professional boxing asaya ka danga tang tashi nung asayaa mali.
Tena tsüngteptsüba sangdongba sülen tang tashi nung khen danga ajurutepa mali saka tena promotional tour aotsü atema yakda sangdongtsü imlar aser iba sentong nung US nung yimti tongtibang ka ana semdangtsü südi.