Srikanth-i Indonesia Open Super Series kokogo

Jakarta, June 18 (Agencies): India nunger badminton asayar Kidambi Srikanth-i Indonesia Open tebur kicha asaya koka Super Series title asembuba kokogo. Pai Deobarnü final asaya nung Japan nunger asayar Kazumasa Sakai madak takok angu.
World No.22 Srikanth shibai April ita Singapore Open final tongteta liasü pai Sakai minute 37 agia 21-11 21-19 agi straight set nung koka senpet sen $75,000 agizük.
“Pai kanga junga asayaogo, talisa tanabuba asaya nung pai kanga junga asayatet aser kü atema point 6-11 ta aliba nungi 13-13 ta tongtetba ajanga asaya nung temelenshi bener aru,” ta Srikanth-i ashi. Pai tang tashi nung iba asayamong akokba densema 2014 China Super Series Premier aser 2015 India Super Series ta koka lir.
“Ni kü coach tenüngsangner kechiyong pa aruba sülen ni Singapore nung final tongtet aser tang iba asayamong akoker, koba asayamong rongnung tulutiba ama züngshir. Maneni ni kü pusemertem shirnoki hopta peyong ni nungita aruogo parnok ajak dang kanga pelaba lemsateper,” ta pai shisem.
Badminton Association of India (BAI) tir Himanta Biswa Sarma-i Kidambi Srikanth nem sen lakh 5 agütsütsüba nangzükogo. “Srikanth-i Indonesia open akokba ya linük ajak asoshi pelatepba mapang ka lir. Ni asaya temli pa takok atema tenüng asangtsü asoshi call süa liasü. Pai linük ajak ajungkettsüogo aser tarutsü nunga pai takok tajung angutsü ta ni temolung lema bilemer,” ta Sarma-i ashi.
“”Onok ajak Kidambi-i akokba atema kanga pelateper aser iba tepela lemsateptsü atema Dr. Sarma-i BAI tenüng nung pa nem sen lakh 5 agütsütsü nangzükogo,” ta BAI General Secretary Anup Narang-i ashi.
Kasa mapang nung Ato kilonser Narendra Modi-i Indonesia Open Super Series nung Kidambi Srikanth-i takok anguba atema pa tenüng sanga liasü.