Jerusalem nung police tem amakba atema ISIS-i tenüng agir

Jerusalem, June 19 (Agencies): Israel-i ketdangsüa aliba tesem ka nung Palestine nungertemi Israel police ketdangser ka tepsetba aser ana yirutsüba atema Islamic State-i tenüng agiba sangdong saka Israel ketdangsertemibo IS pur shilem kecha mali ta shiogo.
“Tsüngrem teyari ajanga onoki Temple Mount anasa, Jerusalem tiyongtsü nung makogo. Iba ya tatembang masü saka tetenzüker ang lir” ta IS-i Amaq news agency ajanga metetdaktsü.
Hokolbarnü Jerusalem yimti nung Damascus gate anasa lendong ana atalok, ta The Jerusalem Post ajanga ashi.
Palestine nunger nisung anati Israel police ketdangser telok ka dak injang khaloktsü aser kotari agi tsüngsettsü merang. Ano, külen Palestine nunger kati border police tetsür ka tsüngset. Palestine nunger asempronglaji police-i khaset.
Iba nung IS puri shilem agiba kuli kecha mali, ta police otongdar Micky Rosenfeld-i ashi.
Palestine nunger asemji Bara Ibrahim Muhammad Saleh (19), Adel Hassan Ahmad Anakush (18) aser Osama Ahmad Mustafa Atta (19) ta jangjaogo.
“Kiralongrar asem jagi tasa atonger mapa inyak. Parnoki Carl Gustav automatic prangpong ka aser kotaritem bener liasü. Zedekiah’s Cave anasa mezüng injang khaloktsü aser idangji Border Police ketdangsertemi parnok dak meyiper injang khaloktsü. Idakji kiralongrar anaji khaset aser lendong nung police aser civilian ka yiru” ta Micky Rosenfeld-isa metetdaktsü.
Iba lendong atalokba sülen secongd ishika lir, Palestine nunger kati policewoman Hadas Malka dak kotari agi atsüng.
“La dak kotari agi aiben atsüngba ajanga kanga mejungi yiru aser mozükidangi anir ao saka tia maka la süadok” ta Micky-isa shisem.
Külen, Hamas-ia iba tatalokba ana atema tenüng agiba metetdaktsü.
“Jerusalem nung mapa takok ngua inyaker asemji Daesh (IS) den tesentaktep kecha mali. Parnokji PFLP (Popular Front for the Liberation of Palestine) aser Hamas den züngsema liasü” ta Hamas’ Izzat El-Reshiq-i Twitter nung metetdaktsü.
Taoba ita U.S. tir Donald Trump-i Israel semdangdang, Jerusalem nung aliba Western Wall nung teka agi nemeter Tsüngrem dang nungi shisatsü meshia sarasadem.
America nung tir teinyakdak nisung kati Judaism indang tesem temeshitiba semdangbaji Trump lir.