Facebook nung mi lendong nung rongseter noksa inoktsüba atema nisung ka jail-i yok

June 19, 2017 (Agencies): Grenfell Tower arongba nung rongsetertem noksa Facebook nung post sütsüba atema nisung ka Britian nung jail-i yokogo.
Arishi küm 43 tain Omega Mwaikambo-i pai Facebook nung noksa inoktsüba nangzükba sülen Westminster Magistrates’ Court-i pa ita asem atema jail-i yokogo, ta osang ka ajanga metetdaktsü.
Scotland Yard ajanga ashiba agi, Mwaikambo communication meshidaki amshiba atema aitsüogo.
West London, North Kensington nung mi lendong nung asürtem junga menembangi aliba noksa online nung post sütsüba sülen Mwaikambo apu. Pai Communications Act kübok okadak ana nung aibelen nangzüka tatok meshi.
Pai noksa inoktsüba shia atema hopta trokrok jail-i yok koba ajak meyokteper hopta 12 (ita 3) lir, ta Scotland Yard-i metetdaktsü.
Pai post sütsüba noksa rongnung tebur ka alibaji mejangjateti liasü, saka nisung kati osang benertem dang ashiba agi, ibaji pa teti Mohammed lir, shiba mi lendong nung rongsetba jangjar liasü saka temang mejangjateti liasü.
“Tanep onoki tasümang social media nung angu aser police-i iba indang kecha memeteti liasü. Iba noksa ya social media nung post mesütsü nung jungla. Police temi ashiba agi, parnoki onok nem osang tejangja memetet tashi osang kecha magütsütettsü,” ta pai ashiba osang ajanga metetdaktsü.
Iba ni lendong nung samara parnok 58 tashi monguteti lir aser police temi parnok sür alitsü ta bilemer.