NDA-i Tir candidate atema Ram Nath Kovind shim; Opposition-i June 22, 2017 nü telemtetba agitsü

New Delhi, June 19 (Agencies): Hombarnü NDA presidential candidate asütsü atema shimba sülen Ram Nath Kovind-i yimtenren telok ajaki pa pusema nungittsü imlar ta ashi.
Tanü BJP tir Amit Shah-i, India Tir inyaktsü atema BJP-i aniba NDA-i Bihar angh Ram Nath Kovind shimer, ta osang metetdaktsü.
BJP Parliamentary board senden ka amenba sülen Amit Shah-i, “Onoki tatong tir atemabo kecha mejembi” ta ashi.
Ram Nath Kovind ji aluyimer ka jabaso lir aser pai taküm piyong public service aser sensakertem atema inyaka arur, ta paisa shisem.
PM Modi-i Congress lennir Sonia Gandhi aser taoba Prime Minister Manmohan Singh na den NDA-i shimba nübo indang osang lemsatepogo aser tang parnok (Congress aser tangartem) sasep nung jembir telemtetba ka agitsü, ta BJP tirisa metetdaktsü.
Tanü Bihar Angh, Kovind-i Patna nungi New Delhi-i aruba sülen osangbener den jembidang, “Yimtenren telok balala nungi MP aser MLA tem, shirnok electoral college nung züngsemtem lir, ni parnok ajak dang ni yaritsü mepishir. Ni parnok den ajuruteptsü aser teyari meshitsü” ta ashi.
Bihar Chief Minister Nitish Kumar-ia pa pusema nungittsü nangzük asü masü ta asüngdangdang, Kovind-i “pai kü den phone ajanga jembiogo” ta langzü.
“Ni Bihar nung Angh inyaker aser ni Tir candidate shimba osang angazükba sülen, Nitishji-i kü den phone ajanga jembi” ta paisa ashi.
Opposition-i pa anema tokteptsü atema candidate ka shimtsü asü ta asüngdangdang, “India nung senso ajaki ni pusema nungiter aser moatsür ta ni bilemer” ta Kovind-isa langzü.
Prime Minister Narendra Modi aser BJP-i pa dak temulung alemba aser iba tebilemtsü khuret tulu agütsüba atema pelar, ta paisa shisem.
Tanü Delhi airport tonga arudang Thawar Chand Gehlot, JP Nadda, Bhupendra Yadav, Kailash Vijayvargiya aser Manoj Tiwary nungertemi anir union minister tem aser BJP lennirtemi Kovind pela agizük.
NDA sorkari Tir candidate atema Ram Nath Kovind shimba osang sangdongba sülen, ghonda ishika lir Opposition-i June 22, 2017 anogo nungang parnok tebilemba metetdaktsütsü ta ashi.
“Onok June 22 nü ajuruteptsü aser iba sülen jiang onoki lemtetba sangdongtsü” ta West Bengal Chief Minister Mamata Banerjee-i ashi.
Mamata-i Kovind shimba atema kecha balaka mashi, saka pa mapang ka BJP indang Dalit Morcha nung lennir asüba agi Tir candidate shim, ta metetdaktsü.
Ano külen, taoba Uttar Pradesh Chief Minister aser Dalit lennir Mayawati-i Kovind shimba anema menokdaker, saka opposition-i Dalit nunger ka shim nungbo anema nokdaktsü ta ashi.
“Pa Dalit nunger ka lir aser iba jagi onoki agizüker. Ajisüaka, NDA-i non-political Dalit nisung ka Tir candidate shim asübo kanga tajungba süla” ta Mayawati-isa ashi.
Ram Nath Kovind ya October 1, 1945 nü Uttar Pradesh kübok Kanpur Dehat nung aso. Pa ya Kanpur University nungi BCom aser LLB graduate ka lir.
1994-2000 aser 2000-2006 nung pa Uttar Pradesh nungi Rajya Sabha nung shim. Pa ya advocate ka lir aser Delhi nung mapa inyaker.
Kovind-i taoba mapang BJP Dalit Morcha tir (1998-2002) aser All-India Koli Samaj tir inyakogo.
Paisa, BJP national spokesperson ka ama inyak aser August 8, 2015 nü India Tir-i pa Bihar Angh inyaktsü atema shim.