24 Angetyongpang A/C NPF Office lapokogo

Mokokchung, August 20 (TYO): August 20, 2015 nü Mokokchuung, Sungkomen ward nung Wb. Alemchuba Kichu’er kidang 24 Angetyongpang A/C NPF Office lapokba sentong kanga longsoa mongogo, ta 24 A/C Angetyongpang Tir, Sentimar aser General Secretary, Imkumsangba nati külem sangdong ka ajanga metetdaktsü.
Iba sentong nung Angetyongpang nung aliba unit 12 nungi party lenirtem aika den kulemi CEC Member, Parliamentary secretary veterinary animal husbandry PS, Wb. Aokumba dena liasü.
Sentong nung Tongti tesemdanger NPF Mokokchung Division Tir, Wb. Moasangba Jamir den kulemi division office bearer aika arua aden aser tongti tesemdangeri wako ajungketba den kulemi party inyakyim aser ketdangsür ka teinyaktsütem indang lemsatepa liasü.
Iba sentong nung jembidang Wb. Moasangba-i, tangatetba tajung nung NPF party nung adentsü jangrar ajaki tim lenmang ajanga party nung tenüng züluoktsüla, ta metetdaktsü.
Tongti tesemdanger dak alia party nung tenzüker aikati tayongzükba o jembia liasü, ta kasa sangdong ajanga ashi.