Dimapur nung sen lakh 60 alang yi raksa endok

Dimapur, June 19 (TYO): Hombarnü Dimapur kübok DMC dumping ground nung sen lakh 60 dak tema alang Indian Made Foreign Liquor (IMFL) raksaa endokogo.
Chief Judicial Magistrate, Dimapur, Ajongba Imchen, district administration, police, Naga women hoho aser GB tem matsüngdang yiji raksa endok.
Taoba ita 3rd mile, Dimapur nung Assam Rifles aser Diphupar police nati garage ka nungi yi tapu balala case 1770 nguteta liasü. Iba yi kiburjibo ano meputet lir aser tanü yiji raksa endok.
Sentong nung Dimapur Naga Women Hoho, tir Arenla Aier-i ashiba agi, yi raksa endokbaji tejak meiba mapa ka dang lir, kechiyong asen kidanger state- Assam nungi yi talubosa belener.
Inter-state check gate tem nung ketdangsertemi pei lemzükba mapa timi inyak nungdang, asen state nung yi talubosa anguba ya nokdangtettsü. Yi pur yamai raksa endokba agibo menokdangtettsü, ta laisa shisem.