Angh Acharya-i Rajnath Singh aser R.N Ravi na den ajurutep

Dimapur, June 19 (TYO): June 18, 2017 nü Nagaland House, New Delhi nung Nagaland Angh, P.B. Acharya-i Naga yimjung olemtep atema GOI interlocutor R.N. Ravi den ajurutepa Naga yimten tebilemtsü dak sendakba onüktem lemsatep.
Angh Acharya-isa June 19, 2017 nü Union Home Minister, Rajnath Singh den ajurutep aser iba mapang R.N. Ravi dena liasü, ta PRO to Governor-i sangdong ka nung metetdaktsü.
Mapang talangka Naga nunger dak sendakba onüktem bentettsü atema sendaktepa alirtem ajak longjemtsüla ta senden nung jembi.
Telungpur teloktemi tashiyim agi sen meshiba aser talisa iba khuret ajanga Dimapur aser Kohima tsüngda 4 lane mapa inyakba contractor temi mapa anentsüsa akümba indang onük atema Angh-i tebilemtsü bena lemsatep.
Gari lenmang yangluba metenzükra, iba mapatong nung tamakok tulu alutsü, kechiyong tzüngluru mapang tongogo aser lenmang mejungra, tang nüngdakba chiyungtsü aser osettem dena mebentettsüsa tensa ajurutsü, ta Acharya-isa ashi.
Senden nung Home Minister Rajnath-i onüktem ajak kanga süoki ia agizük aser paia tebilemtsü abenba metetdaktsü, ta PRO to Governor sangdong nungsa shia lir.
Nagaland Angh, P.B. Acharya-i Delhi nung anogo asemnü official tour senzüba sülen June 20, 2017 nü state yimtibai meyipa arutsü, ta sangdong nungsa shisem.