West Bengal nung nisung 9 asü

Kolkata, June 20 (Agencies): West Bengal kübok tzünglu aser tsüngi ajanga nisung 9 tashi taküm samaogo.
Yashi nikongdang nungi lendong balala nung nisungtem asü aser tasür 9 rongnung 8 ji tsüngi agi aiset aser ka awatsüng ka nung arakset, ta ketdangsertemi metetdaktsü.
Tasürtemji Hooghly nung pungu, East Burdwan nung ana aser North 24 Parganas nungi ka liasü. Ano, Bankura nung nisung ka awatsüng nung arakset, ta state disaster management department ketdangser kati ashi.
Bihar, Jharkhand aser West Bengal nung tsüngsang-mopung majungba ajanga Bankura, East & West Burdwan, East & West Midnapore, South & North 24 Parganas aser Murshidabad district tem nung tzünglu kanga arur, ta Met director G K Das-ia ashi.
Asüng tashi item district tem nung tzünglu arutsü. Taruba anogo tashi Bengal anüdoklentip tsütsü tzünglu tulu arutsü, ta paisa shisem.