Tripura nung nisung 423 samar monguteter

Agartala, June 20 (Agencies): Tripura nung 2014 January nungi tenzüka küm asemser tesadang ka tsüngda nung tanur 23 densema nisung 423 samaar monguteti lir. Police temi tanü osang ka sangdongba nung ashiba agi, 2014 January nungi 2017 May 31 tashi nung nisung 467 samaba keno Tripura nung police station balala nung benoka lir, item rongnung 2014 küm parnok 126 sama, 2015 küm 153 sama, 2016 küm parnok 139 aser tanü tashi nung parnok 49 samar monguteter.
Ajisüaka nisung samaba ken o benoka aliba rongnung parnok 423 tang tashi kechi nung alia mejangjateter aser Supreme Court guideline nung aliba ama tashiyim agi puer aoba ken o ama parnok ken o tem benoka lir. Police temi ashiba agi, item nisungtem bushitettsü asoshi parnoki takoktashi bushisüngdangdar. Maneni samara alirtem rongnung karbo state adena pei poksüng aatsü asoshi ayangi or alitsü ta temolung melemi bilemer.