Darjeeling nung mepetmesü ajanga Sikkim ajangzüker

Gangtok, June 20 (Agencies): Raliwalirtem kanga dang bulua senzüba mapang ka nung Darjeeling nung mepetmesü adokba ajanga Sikkim nung raliwaliba ren nung terenlok bener arutsüogo.
Sikkim Tourism Secretary C Zangpo-i ashiba agi, “Darjeeling nung mepetmesü aliba ajanga idaki ajungbena dang raliwaliba ren nung kanga ajungketogo. Gangtok nung raliwalirtem anendak ajak süngadokogo aser taruba anogo temaa mekaadokogo.”
GJM puri anir Darjeeling nung longkak aitba ajanga bendanglen aser linük nungi raliwalirtemi aikati iba jila semdangtsüba sentong thiogo
Sikkim Tourism secretary ajanga ashiba agi, Sikkim semdangba raliwalirtem timbaka Darjeeling semdangtsüba asoshi sentong liasü mesüra parnok idak nungjiagi Sikkim-i arurtem aika lir.
Secretary aser Travel operator temi Raliwalirtem paika ya mapang ka nung anepalutsüba nung timtem ajuruba shisema laisü.
“Onoki travel operator aser hotel anepalurtem dang raliwalirtem takok tashi anendaktsütsü asoshi merangtsüba metetdaktsüogo aser iba maparen inyakba mapang nung tourism industry tenüng meraksatsüi takok tashi anepaluba yimya jenjang tamajungba mekümdaktsütsü merangatsü asoshi shiogo,” ta Zangpo-i ashi.
Hotel temi tanendak mekar tasentem thitsü tenzükogo kechiyong hotel tem July ita tom tashi mekaadoker lir.
Sikkim nungi raliwalirtem nem anogo shia security den Sikkim Nationalised Transport bus tem agütsür koba ajanga parnok anisüngzüker aser lentom nung maneni senzüteter.
Osang ka ajanga ashiba agi, Sikkim sorkari June 18 nü West Bengal sorkar dang Darjeeling district nung NH 31A adena senzürtem nem tekümzükba agütsütsü asoshi mepishiogo. Iba dak sendakba nung West Bengal sorkari Sikkim-i aoba gari ajak nem security agütsütsü asoshi nangzükogo.
Darjeeling district kübok Sevoke aser Gangtok na km 92 NH 31A agi sendaktepa lir aser iba lenmang ya Sikkim nunger atema tongtibangtiba lenmang lir. Iba NH km 30 shibo West Bengal adena süier.