LKM-i L.Panger aser L.L. Yaden senpet agütsütsü

Dimapur, June 20 (TYO) : Langpangkong Kaketshir Mungdang (LKM) tenzükba anogomong amongba den repsema tsürabur lenir ana tenüng nung tentetba L.Pangersowa Trust Award aser L.L.Yaden Meritorious Scholarship agütsüba sentong ka June 22, 2017 anepdang 10:00 ako nungi Chuchuyimlang Town hall nung akatsü renema lir.
Iba sentong nung Wb.T.Aochuba Longkumer IFS, DTO Mon, tongti tejaoker asütsü aser Chuchuyimlang putu menden nung mendenbuba Wb.Aosanen Pongeni tajungshi o ashitsü. Iba sentong nungsa AKM tir Wb.Imkongwati-i salem o ashitsü aser Unger Kaketshir Telongjemi ken ka atentsü. Iba sülen Chuchu town Baptist Arogo nung sannüker Rev.Temjeni kaketshirtem atema sarasademtsütsü.
Iba sentong nung LKM lenirtem den teyaritepertem aser yimtsüng shia nungi kaketshirtem Telongjem ketdangpurtem ajak medema arua adentsü asoshi LKM ketdangpurtemi mepishia metetdaktsüogo.