NH29 nung KYO züngsem merenshiba aitsür: WAYO

Dimapur, June 21 (TYO): June 15, 2017 nü National Highway 29 nung prangpong amertemi Kiruphema Youth Organisation züngsem ka yirutsüba aitsür, ta Western Angami Youth Organisation (WAYO)-i tanü sangdong ka nung metetdaktsü.
Bushisüngdang asüba ajanga, KYO züngsemji anentsüh alua aliba tesem nung traffic ketdangsüa lia, registration plate maliba SUV ka nung nisung ana aru aser tenati pai ashiba manga. Tenati KYO züngsem dang o tamajung shia merenshi aser tena rongnung nisung kati pistol ka agiteter, tekolak nung pistol agi aiben ako ta angazükogo, ta WAYO-i sangdong nung shia lir.
NH29 nung anentsüh aluba aliba tesemtem nung senzüsenbonger yarirtem dak yamai mapa tamajung inyakba ya nüji shisatsü alirtemi ajaki aitsütsüla. WAYO-i iba inyakyim aitsür aser magizüker aser bangdak ketdangpurtem dang aibelenertem pua merenshitsü akhanger, ta WAYO tir Neidilhoutuo Sechü aser tongti tezülur Nijasielie Terhüja nati sangdong nung metetdaktsü.
Iba mapa inyakertemi parnok sasa nangzüktsüla aser tatok meshitsüla, mesüra NH 29 nung parnok künübosa aputsü aser idangji timtem ajurutsü akok, kechiyong iba mapang lenmang nung senzürtemi nisung anaji jungjunga ajioka lir, ta WAYO mendenpurtemisa shisem.
WAYO-isa yirua alisang tekaratiba nung taneptsü angutsü atema moatsür aser Kiruphema Youth Organisation dang maneni nübortem tenzükba mapa inyaktsü ayongzüker, ta metetdaktsüogo.