JD(U)-i NDA Tir candidate Ram Nath Kovind pusemtsü

Patna, June 21 (Agencies): Opposition party tem atema osang tamajung kaji, Janata Dal (United)-i NDA Tir candidate, Ram Nath Kovind pusemtsü lemtetogo.
Bodhbarnü JD(U) senden ka mena liasü, aser iba senden nung parnoki BJP-i aniba NDA Tir candidate pusemtsü lemtet.
Sonbarsha constituency nungi MLA, Sada-i, “Party-i Kovind pusemtsü lemtetogo. MLA tem senden nung iba telemtetba agi,” ta metetdaktsü.
Yashi Bihar Chief Minister, Nitish Kumar-i NDA Tir atema Kovind candidate shimba asoshi pelaba lemsatepba sülen tanü state sokar tashi nung aliba party-i pa pusemtsü lemtetogo.
Kovind ya Bihar Angh teinyakdak liasü.
Yashi Shiv Sena-i NDA Tir candidate pusemtsü lemteta liasü.
Ano külen Left party temi ajungshiba nung ajemdaker Congress-i aniba opposition party temi NDA candidate Kovind den toktepdaktsütsü asoshi candidate shimtsü.
June 22, 2017 nü opposition front senden amendang Kovind anema tokteptsü atema telemtetba agitsü, ta CPI national secretary D Raja-i metetdaktsü.