Justice C S Karnan Kolkata Presidency Jail nung puokogo

Kolkata, June 21 (Agencies): Court mezüngmeshiba ken o nung yashi Retired Kolkata High Court judge, Justice C.S. Karnan pua liasü aser Bodhbarnü Supreme Court (SC)-i pa nem interim bail magütsüba sülen pa Kolkata nung aliba Presidency Jail nung puokogo.
Justice D. Y. Chandrachud aser Justice Sanjay Kishan Kaul nati akumba vacation bench-i, Justice Karnan nem tamalen ita trok tepoukdak ayutsü obendang agüja aliba agientsü memelung.
Karnan atema okatsür, Mathew J Nedumpara-i vacation court nem iba temepishibaji agütsü saka bench-i magizük.
Nedumpara-i SC dang, bail meshiba den külemi ita trok tepoukdak ayutsü obendang agüja alibaji agientsü mepishi, ajisüaka court-i, “Obendanger teneti akumba bench-i iba obendangji agütsüogo. Ibajagi ajak alener, iba jagi asenoka alener,” ta ashi.
Yashi Coimbatore, Tamil Nadu nung Kolkata police-i Justice Karnan pua liasü.
May 19 nü Karnan-i SC dang ita trok tepuokdaki aitsü obendangji agientsü mepishia liasü saka court-i magizük.
Karnan-i Madras High Court aser SC obendangertem anema shidi aika zülua liasü, iba sülen February 8 nü pa dang nungi administrative aser judicial tashitem agien.
India nunger judiciary putiotsü nung tang mezüng high court nung teinyakdak obendanger ka tepoukdak ayutsü obendang agütsübaji ibai lir.